गौतमदास मानन्धरया ‘कमब्याक’ म्ये

येँ (नेपालभाषा टाइम्स)- पुलांम्ह गायक गौतमदास मानन्धरया न्हूगु म्येया म्युजिक भिडियो सार्वजनिक जूगु दु । शुक्रवाः म्यूजिक भिडियो सार्वजनिक यासें म्येया संगीतकार अनिल शाहीं थ्व म्ये गायक मानन्धरया ‘कमब्याक’ जूगु खँ धयादिल । ताःई न्ह्यवनिसें म्ये हालेगुपाखें तापाक च्वंच्वनादीम्ह मानन्धरया ‘झिमिक्क परेली’ म्येँया म्यूजिक भिडियो पिदंगु खः ।

हाइलाइट्स नेपालया च्यानलपाखें युट्युबय् सार्वजनिक जूगु म्येय् मानन्धरयात नांजाःम्ह गायिका निशा देशारं साथ बिउगु दु । म्यूजिक भिडियोय् मनोज महर्जन व हसना महर्जनं मू भूमिका म्हितातःगु दु । रेश्मा खड्गी व सुमित शाहीं कोरियोग्राफि याःगु भिडियोया छायाँकन व सम्पादन अभि शाक्य व बबिन देसारं यानातःगु दु । अञ्जु मानन्धरं निर्माण याःगु लोक–आधुनिक समिश्रण दुगु डान्स बिटय् दु ।

गायक मानन्धरया थ्वयां न्ह्यः तःपु नेपाली व नेपालभाषाया म्ये पिदनेधुंकूगु दु । वय्कःया ‘उदास उदास’, ‘तिमिलाइ हेर्ने’, ‘रोउँ भने’, ‘सदाबहार’ आदि म्ये पिदनेधुंकूगु दु ।