भाग्यमानी दिशा

फिल्म उद्योगय् एकछत्र राज यानाच्वनीपिं कलाकार म्हो हे जक दइ । छुं छुं भाग्यमानी कलाकारं जक तःदँ तक निरन्तरता बियाच्वंगु दइसा गुलिं निगू प्यंगू, च्यागू झिगू फिल्म म्हिते धुंकाः थ्व ख्यलं तापाना वनी । छाय्कि इपिं बांलाःम्ह निर्देशक वा निर्माताया वा निर्माण कम्पनीया मिखाय् लाइमखु वा लाये फइमखु ।

अझ विशेष यानाः नायक स्वयां नं नायिकात निगू प्यंगू फिल्म म्हितेवं थ्व ख्यलं तापाना वनी । तर थ्व मामिलाय् नायिका दिशा पटानी धाःसा भाग्यमानी हे धायेमाः । बलिउड नायिका दिशा पटानीया भाग्य धाःसा थ्व इलय् अजू चायापुक हे थिना वनाच्वंगु दु धाःसां छुं पाइमखु । ‘बागी–२’ नांया संकिपा सुपरहिट जुइवं दिशाया भाग्य नं बलिउड फिल्म उद्योगय् थिना वयाच्वंगु दु ।

संकिपा सुपरहिट जुइवं दिशा थौंकन्हय् आपालं निर्माताया मिखाय् लानाच्वंगु दु ।थ्व झ्वलय् दिशां आः न्हूगु संकिपा कथं ‘भारत’ नांया संकिपाय् बलिउड सुपरस्टार सलमान खानलिसे म्हितीगु पक्का जुइधुंकूगु दु । अथे हे सलमान लिपा मेम्ह छम्ह बलिउड सुपरस्टारनाप नं दिशां म्हितीगु पक्का जुइ धुंकूगु भारतीय संचारमाध्यमं न्ह्यथंगु दु ।

रोहित धवनया निर्देशनय् दयेकेत्यंगु न्हूगु संकिपाय् दिशा बलिउड सुपरस्टार ऋतिक रोशन नापं खने दयेकः वइगु जूगु दु । फिल्मय् ऋतिकया जोडीया रुपय् दिशायात काइगु पक्का जुइधुंकूगु भारतीय संचारमाध्यमं न्ह्यथंगु दु । थ्व ल्याखं दिशाया भाग्य बलिउड फिल्म उद्योगय् बांलानाच्वंगु चर्चा दु ।