‘कतांमरि’ म्येचाःया पितब्वज्या

किपू (नेपालभाषा टाइम्स)- नेपालभाषा एकेडेमीया निंतिं अनक मिडियाया न्ह्यब्वया कथं न्ह्याना वयाच्वंगु नेवाः एफ.एम.या ‘जि नं म्ये हाले सः’ ज्याझ्वः २५ ब्व पूवंगु लसताय् किपूया किर्तिपुर सिनेप्लेक्स हलय् छगू लसता ज्याझ्वः जुल । ज्याझ्वलय् ‘जि नं म्ये हाले सः’ रेडियो ज्याझ्वःया न्ह्याकामि व म्येहालामि गंगादेवी महर्जन व ख्यालिजुजु मदन कृष्ण श्रेष्ठं हालादीगु ज्वः म्ये ‘कतांमरिया रुप छंगु’ या म्यूजिक भिडियो पितब्वज्या नापं म्येहालामि गंगादेवी महर्जनया ‘कतांमरि’ म्येचाः नं उलेज्या जुल ।

ज्याझ्वःया सभानायः अनक मिडियाया नायः नबिन महर्जनं लसकुस यानादीगु ज्याझ््वलय् नेवाः एफ.एम.या प्रबन्ध निर्देशक श्रीकृष्ण महर्जन, स्टेशन इन्चार्ज बीरेन्द्र शाक्य व गंगादेवी महर्जन लगायतं ‘जि नं म्ये हाले सः’ ज्याझ्वः व नेवाः एफ.एम.या बारे खँ तयादिल ।

ज्याझ्वलय् विशिष्ट पाहाँपिं ख्यालिजुजु मदनकृष्ण श्रेष्ठ, संगीतख्यःया न्ह्यलुवाःपिं रत्न बेहोशी बज्राचार्य व जुजुकाजी रंजित, लोककवि राजभाई जकःमि, वरिष्ठ पत्रकार विजयरत्न असंबरे, संगीतकःमि जुगल डंगोल व अनक मिडियाया नबिन महर्जनं मंकाः कथं ‘कतामरी’ म्येचाया पितब्वज्या यानादीगु खः । उगु म्युजिक भिडियोयात कयाः पाहांपिं असंबरे, जुगल डंगोल लगायतं न्ववानादीगु खः ।

ज्याझ्वलय् पितब्वज्या जूगु ‘कतांमरीया रुप छंगु’ म्युजिक भिडियोया निर्देशन रवि सायमिं यानादीगु खःसा सुदित श्रेष्ठ व राष्ट्रिका शाक्यं म्हितादीगु दु । महेश महर्जनं निर्माण यानादीगु भिडियोया किपालुमि रोमन मार्स, हुलाप्याखं स्यनामि कृष्णभक्त महर्जन, लय् चिनामि व बाजं ग्वसामि जुगल डंगोल, म्येच्वमि संघरत्न शाक्य व सम्पादन रवि साय्मि खः ।

सम्बन्धित बुखँ

LEAVE YOUR COMMENTS