बालेनं पार्किङ लागाया विवरण फ्वन

येँ (नेपालभाषा टाइम्स)-न्हू सतकय् पार्किङ बन्द यायेवं शुरु जूगु विरोधया कारणं मनपाया मेयर बालेन साह छपलाः लिचिउगु संकेत खने दुगु दु । पार्किङ निषेधया कडा विरोध जुइवं मेयर साहं आः थ्व लागाय् सतकय् हे पार्किङ यायेमाःगु खः गन गन लागाय् पार्किङ यायेमाःगु खः, अन गुलि थाय् दु, ग्वःगः तक मोटरसाइकल तये फइ, उकिया विवरण छ्वया हजि धकाः इनाप याःगु खँ सीदुगु दु । वय्कलं येँ मनपा वडा नं. २२, २३ व २४ यात लिखित रुपं पौ छ्वयाः पार्किङ याये फइगु लागाया विवरण माग यानादीगु खँ सीदुगु दु ।

वय्कलं न्हूसतकय् पार्किङ निषेध यायेवं स्थानीय व्यवसायी व छेँथुवाःतय्सं क्रमवद्ध आन्दोलनया घोषणा याःगु दु । थ्व झ्वलय् म्हीग उमिसं २२ वडाया ज्याकुथिइ हे तालं ग्वयाः मूलुखाय् ब्यानर खाना बिउगु खः ।

मेयर साहपाखें पार्किङ लागाया विवरण छ्वया हजि धकाः वःगु पौया बारे २२ वडाया वडा अध्यक्ष चिनीकाजी महर्जनयात स्वापू तयाः न्यनाबलय् वय्कलं मनपापाखें वःगु पौयात कयाः आः थःपिंसं विवरण तयार यायेगु खँ कनादिल । न्हू सतक लागाय् पार्किङ निषेध यायेवं सलंसःदँ पुलांगु थ्व बजाः लागा हे ध्वस्त जुइगु अवस्था वःगु खँ कँसें थुकिया बारे मेयर थम्हं हे बिचाः यायेमाःगु खँ नं कनादिल ।

न्हू सतक लागाय् पार्किङ चीकेधुंकाः लँ खुल्ला जूसां बजाः सुनसान जुयाः झिझांदं थें खने दयाच्वंगु दु । पार्किङ बन्द जुइवं व्यापारय् लिच्वः लायेधुंकूगु खँ पसल्यातय्सं धाःगु दु ।