संसद विघटन असंवैधानिक : नेपाः पार्टी

येँ (नेपालभाषा टाइम्स) – नेपाः राष्ट्रिय पार्टीं प्रतिनिधिसभा विघटन याःगु ज्यायात गैर संवैधानिक ठहर यासें पार्टीया गम्भिर ध्यानाकर्षण जूगु खँ धाःगु दु । पार्टीं छगू विज्ञप्ती जारी यासें थ्व हे वंगु पुस ५ गते प्रधानमन्त्री केपी शर्मा ओली नेतृत्वया सरकारं संसद विघटनाया प्रस्ताव याःगु व उकियात राष्ट्रपतिपाखें नं अनुमोदन याःगु ज्याप्रति थःपिनिगु पार्टीया गम्भिर ध्यानाकर्षण जूगु खँ न्ह्यथंगु दु ।

पार्टी केन्द्रीय कमिटीया नायः डा. विजयप्रकाश सैंजूं ल्हाःचिं तयाः पिथनादीगु विज्ञप्तीइ संसद विघटनया ज्या लोकतन्त्र व गणतन्त्र विरोधी ज्या जक मखसे थुकिं अन्तर्राष्ट्रिय ख्यलय् हे नेपाःया बदनाम यायेगु ज्या जूगु पार्टीया ठहर जूगु खँ न्ह्यथनातःगु दु । स्वब्वय् निब्व बहुमत दुगु केपी ओली नेतृत्वया सरकारं सत्तारुढ नेकपाया आन्तरिक कचवं नं यानाः प्रतिनिधिसभा विघटन यायेगु ज्या धइगु गः निरंकुश व तानाशाह प्रवृत्ति न्ह्यब्वयेगु ज्या जूगु व जीवंकाःछि थः हे जक सत्ताया नेतृत्व याना च्वनेगु षडयन्त्र खः धकाः विज्ञप्तीइ धयातःगु दु ।

थुकथंया गतिविधिं देय् व जनताया हित जुइगु ज्या गबलें नं मजुइगु निश्चित दुगु व वइगु बैशाख महिनाय् निर्वाचन यायेगु धइगु नेपाःयात थप अर्बौं तका दांया भार लाकेगु खः धकाः नं धयातःगु दु । प्रतिनिभिसभा भंगया निर्णय लित कयाः संसदया चिकुलाया अधिवेशन नं याकनं सःतेत पार्टीं माग याःगु दु । यदि संसद भंग यायेगु निर्णय लित मकाल धाःसा थ्वयां लिपा ब्वलनीगु परिस्थितिया जिम्मा केपी ओली नेतृत्वया सरकारं हे कायेमालीगु नं पार्टीं न्ह्यथंगु दु ।