लुम्बिनीइ अन्तर्राष्ट्रिय त्रिपिटक वाचन

येँ – बुद्ध जन्मस्थल लुम्बिनीइ बिहीवाःनिसें निक्वःगु अन्तर्राष्ट्रिय त्रिपिटक वाचन शुरु जूगु दु । अखिल नेपाल भिक्षु महासंघया ग्वसाः व प्रदेश ५ या सरकार, शाही थाई मन्दिर व लुम्बिनी विकास कोषया सहकार्यय् त्रिपिटक वाचन न्ह्याकूगु खः । अन्तर्राष्ट्रिय जगतय् बुद्ध जन्मस्थलया थप प्रचार प्रसार यायेगु व पर्यटन प्रवद्र्धन यायेगु आज्जु कथं त्रिपिटक वाचन ग्वसाः ग्वःगु खः ।

वंगु झिंखुदँ न्ह्यवंनिसें भारतया बोधगयाय् त्रिपिटक पाठ जुयाच्वंगु खःसां नं वंगु दँनिसें बुद्ध जन्मस्थल लुम्बिनीइ न्ह्याकूगु खँ ग्वसाः खलः अखिल नेपाल भिक्षु महासंघया अध्यक्ष भिक्षु मैत्री महास्थवीरं कनादीगु दु । त्रिपिटक वाचनया उलेज्या यासें प्रदेशया मुख्यमन्त्री शंकर पोखरेलं लुम्बिनी विश्व शान्तिया मुहान जूगु खँ धयादीगु दु ।

वय्कलं त्रिपिटक वाचनं विश्व जगतय् शान्ति, सद्भाव व भातृत्वया सन्देश वनीगु खँ धयादीगु दु । स्वन्हुयंकं न्ह्याइगु त्रिपिटक वाचन ज्याझ्वलय् नेपाः, भारत, श्रीलंका, म्यानमार, कम्बोडिया, थाइल्याण्ड, चीन, कोरिया, जापान लगायत नीन्यागू देय्या बौद्ध भिक्षु, भिक्षुणी, उपासक, उपासिकापिंसं ब्वति कयाच्वंगु दु । (पूवंक ३ पेजय्)