पद्मरत्न तुलाधरया अन्त्येष्टि क्वचाल (किपा स्वयादिसँ)
- नेपालभाषा टाइम्स
- ११३८ कौलागा त्रयोदशी
- किपा-च्वय्या छपाः किपा रासस । मेगु तेज महर्जन
येँ – नेवाः जाति भाषा आन्दोलनया न्ह्यलुवा लिसें मानव अधिकारवादी नेता पद्मरत्न तुलाधरया राजकीय सम्मान सहित येँया कर्णदीपय् अन्त्येष्टि जुल । वय्कःयात तःधिकम्ह काय् सुजन तुलाधरं मिं तःगु खः । मि तये न्ह्यः वय्कःया सीम्हय् उपप्रधानमन्त्री ईश्वर पोखरेलं नेपाःया ध्वाँय् फायेकादीगु दु । मि तःगु इलय् शसस्त्र प्रहरीया झिछम्ह दुजः दुगु छगू कमाण्डं सलामी बिउगु खः ।
न्हिनसिया २ ता इलय् वय्कःया छेँ लाजिम्पाटं वय्कःया शवयात्रा न्ह्याःगु खः । कमलाछि, असं, न्हाय्कं त्वाः, थाय्मरु, त्यघः, क्षेत्रपाटी जुयाः कर्णदीप तक शवयात्रा जूगु खः । शव यात्राय् आपालं भाषिक नेता कार्यकर्तापिंसं ब्वति काःगु खः ।
अथेहे आपालं भाषिक कार्यकर्ताया लिसें आदिवासी जनजाति नेतापिं कर्णदीपय् वयाः वय्कःया अन्तिम श्रद्धाञ्जली देछाःगु खः ।
कर्ण दीपय् अन्तिम श्रद्धाञ्जली बीत ऊर्जा मन्त्री वर्षमान पुन, नेकपा एमालेया वरिष्ठ नेता वामदेव गौतम, प्रवक्ता नारायणकाजी श्रेष्ठ, संघीय सभाया सांसद कृष्णगोपाल श्रेष्ठ, सांसद जीवनराम श्रेष्ठ, संघीय समाजवादी फोरमया सांसद राजेन्द्र श्रेष्ठ प्रदेश सांसद अजय क्रान्ति शाक्य, बसन्त मानन्धर, पुकार श्रेष्ठपिंसं नं श्रद्धाञ्जली देछायादीगु खः ।
शव यात्रा याये न्ह्यः सुथय् ७ बजे निसें न्हिनय् २ बजे तक वय्कःयात अन्तिम श्रद्धाञ्जली देछायेगु ज्या जूगु खः । अन्तिम श्रद्धाञ्जली देछायेत गृममन्त्री रामबहादुर थापा, नेकपाया वरिष्ठ नेता झलनाथ खनाल, अमृतकुमार बोहरा, सांसद अष्टलक्ष्मी शाक्य, ३ नम्बर प्रदेशया पुलांम्ह भौतिक विकास मन्त्री केशव स्थापित, उपमेयर हरिप्रभा खड्गी श्रेष्ठ, नेपाल चेम्बर्स अफ कमर्सया पुलांम्ह नायः सुरेन्द्रवीर मालाकर आदिपिंसं नं श्रद्धाञ्जली देछायादीगु खः ।
पद्मरत्नया जातः आशा सफुकुथियात
कर्णदीपय् तुलाधरयात मि तयेधुंकाः वय्कःया जातः आशा सफु कुथियात लःल्हाःगु दु । वय्कः छम्ह ऐतिहासिक व्यक्तित्व जूगु लिं जातः सुरक्षित यायेगु कथं आशा सफु कुथियात लःल्हाःगु खः । नेवाः संस्कार कथं मदुम्हेसिया अन्तिम संस्कार लिसें जातः नं च्याकेमाःगु परम्परा दु ।
किपा- तेज महर्जन
LEAVE YOUR COMMENTS