जोशीया फाइल महःसा अख्तियारयात हे कारवाही !

येँ – सर्वोच्च अदालतं नेपाली कांग्रेसया नेता गोविन्दराज जोशी विरुद्ध लानाच्वंगु भ्रष्टाचार मुद्दाय् अख्तियार दुरुपयोग अनुसन्धान आयोगं हे ग्वाहालि मयाःगु धासें आः आयोगयात हे कारबाही यायेगु ख्याच्वः बिउगु दु । जोशी विरुद्ध भ्रष्टाचार व अकुत सम्पत्ती सम्बन्धी मुद्दाया सक्कल मिसिल न्यादँ न्ह्यवंनिसें मबिउगु धासें सर्वोच्चं अख्तियारया सचिव सहित अधिकारीयात कारबाहीया ख्याच्वः बिउगु खः ।

अदालतं माग याःगु आयोगया ज्या व कारबाही सम्बन्धी रजिष्टर लिसें अभिलेख न्यादँ न्ह्यवंनिसें उपलब्ध मयासे न्याय सम्पादनय् पंगः थंगु खँ धाःगु दु । निम्ह न्यायाधीश ईश्वरप्रसाद खतिवडा व सपना प्रधान मल्लया मंकाः इजलासं जोशी विरुद्ध भ्रष्टाचार मुद्दा न्ह्याकेत २०६० साल वैशाख २५ गतेया निर्णय सहितया सक्कल मिसिल, फायल तकं ज्वनाः अदालतय् उपस्थित जुइत सचिव स्वयंयात आदेश बिउगु खः ।

अदालतय् भ्वं बुझे मयाःगु आपत्तिजनक खः धासें थुकिया लागिं अख्तियारया सचिवयात छाय् कारबाही यायेम्वाः धइगु स्पष्टीकरण तकं अख्तियारया अधिकारीतय्त न्यनातःगु दु । अख्तियारं नेता जोशी विरुद्ध २०६० साल असोजय् भ्रष्टाचार मुद्दा दायर याःगु खः । विशेष अदालतं जोशीयात सफाइ बीधुंकाः अख्तियार सर्वोच्चय् पुनरावेदनया निंतिं वंगु खः ।

सर्वोच्च अदालतं २०७१ असोज २९ गते उगु मुद्दा सम्बन्धी २०६० या अभिलेख छ्वयाहयेत आदेश बिउगु खःसां पटक पटक अटेरी यानाः लिचिलेत स्वःगु खँ आदेशय् न्ह्यथनातःगु दु ।आदेशय् धयातःगु दु, ‘आयोग स्वयमं याःगु निर्णय, आयोगया थःगु ज्या कारबाही सम्बन्धी
रजिष्टर लगायतया अभिलेख छ्वया हजि धकाः २०७१ साल भदौनिसें आः तक तःक्वः हे अदालतं पौ च्वयाः नं न्यादँ तक आदेश बमोजिम अभिलेख उपलब्ध मयाकूगु आपत्तिजनक खनेदु ।

थुकिं न्याय निरुपणय् लिबाःगु, न्यायिक प्रक्रियाय् पंगः वःगु व मुद्दाया पक्षयात म्वाःसां म्वाःसां हैरानी जूगु खनेदु ।’ जोशीया भ्रष्टाचार मुद्दाय् थौं सुनुवाइ जुइमाःगु खःसां अख्तियारपाखें सक्कल फाइल मवःगुलिं उगु आदेश बिउगु खः । अख्तियारं जोशीया अकुत सम्पत्ति छानविन यायेगु झ्वलय् काय दिनेश जोशी, ससःकिजा ताराराज पाण्डे लगायत व्यक्तिया नामय् सम्पत्ति लूगुलिं उमित नं विपक्षी दयेकातःगु खः ।

सम्बन्धित बुखँ

LEAVE YOUR COMMENTS