सञ्चयकोषया योगदानकर्ता निम्हतिपुलिं हे उपचार खर्च कायेदइगु

येँ (नेपालभाषा टाइम्स)÷ कर्मचारी सञ्चयकोषं थःपिंथाय् ध्यबा मुंकातःपिंत निम्हतिपुयातं उपचार खर्च बीगु जूगु दु । सञ्चयकोषं थःपिंसं बिया वयाच्वनागु स्वास्थ्योपचार खर्चया दायरा तब्या यासें थ्व सुविधा बिउगु खः । न्हापा जूसां सुनां संचयकोषय् ध्यबा मुंका तःगु खः वयात जक उपचार खर्च बीगु याना वयाच्वंगु खःसा आः फागुन १ गते निसें ध्यबा मुंकातःम्हेसिया कलाः वा भाःतयात नं उपचार खर्च बीगु जूगु दु ।

कोषं वंगु २०७६ साल निसें अस्पताल भर्ना जुयाः उपचार याकूपिं संचयकर्तातय्त सामान्य ल्वचय् जूसा छगू लाख तका बराबरया व घातक ल्वय् जूसा झिगू लाख तकाया स्वास्थ्य उपचार सेवा बिया वयाच्वंगु खः । थ्व सुविधा कायेबलय् उपचार लिपा बिल पेश यानाः शोधभर्ना कायेदइगु खः ।

न्हापा न्ह्यागु अस्पतालय् भर्ना यानाः उपचार याःसां शोधभर्ना कायेदइगु जुयाच्वंगु खःसा आवंलि धाःसा सञ्चयकोषं तोके यानातःगु अस्पतालय् उपचार याःसा जक शोधभर्ना कायेदइगु याःगु दु । आः सरकारं संचालन यानाच्वंगु केन्द्रीय, प्रादेशिक, जिल्ला व पालिकास्तरया अस्पताल, सरकारी स्वास्थ्य केन्द्र व नेपाल सरकारया स्वामित्वय् दुगु अस्पतालया लिसें शिक्षण अस्पतालय् भर्ना यानाः उपचार याःसा जक उपचार सुविधा कायेखनीगु याःगु दु । संचयकोषं थुकिया निंतिं सछि व नीगू अस्पतालया नां तोके याःगु दु । थुपिं अस्पतालत स्वास्थ्य तथा जनसंख्या मन्त्रालयं न्ह्याकूगु विपन्न नागरिक औषधोपचार कार्यक्रम संचालन निर्देशिकाय् न्ह्यथनातःगु १२० गू अस्पतालत हे लाः ।

अथेहे न्हापा संचयकोषं नेपाःया अस्पतालय् सम्भव मजुल धाःसा भारतया अस्पतालय् वनाः उपचार याःसां शोधभर्ना बीगु यानाच्वंगु खःसा आः अज्याःगु व्यवस्था नं चिकूगु दु ।

कोषं साधारण ल्वचय् जूसा छगू आर्थिक दँय् छगू लाख तका बीसा झिंनिताजिया तःल्वय् जुल धाःसा सेवा अवधि दुने मुक्कं झिगू लाख तका बी । कोषं क्वःछिनातःगु तःल्वचय् क्यान्सर, हृदयघात, मस्तिष्कघात, जलास्येँ, हेड इन्जुरी, स्पाइनल इन्जुरी, प्यारालाइसिस, पार्किन्सन्स, सिकललेस, एनिमिया, अल्जाइमर्स ल्वय् लाः ।

स्वास्थ्य उपचार ध्यबा दावी यायेगु निंतिं अस्पताल भर्ना जूगु इलय् तक कोषय् ध्यबा मुंकूगु म्होतिं नं खुला दुगु जुइमाः । अथेहे अस्पतालं डिस्चार्ज जूगु निला दुने शोधभर्नाया निंतिं दावी पेश यायेमाःगु खँ धाःगु दु । यदि विरामी सित धाःसा दावी यायेगु म्याद स्वला जुइगु खँ कोषं धाःगु दु ।