युक्रेनया राजधानीइ श्रृंखलावद्ध क्षेप्यास्त्र आक्रमण

किभ – रुसं लिपांगु इलय् युक्रेनया राजधानी किभय् आःतकया हे दकलय् तःधंगु आक्रमण याःगु दु । रुसं युक्रेनया राजधानी किभय् तःधंगु ल्याखय् ब्यालेस्टिक क्षेप्यास्त्र प्रहार याःगु खः ।

समाचार एजेन्सीतय्कथं रुस-युक्रेन युद्ध शुरु जुइधुंकाः थ्व आःतकया हे दकलय् तःधंगु आक्रमण खः । आःतकया दकलय् तःधंगु आक्रमण धाःगु थुगु घटनाय् छम्ह सीगु दुसा झिंप्यम्ह घाःपाः जूगु दु । रुसं लिपांगु इलय् बहनिसिया इलय् आक्रमण यायेगु याना वयाच्वंगु दु । वंगु शनिवाः नं चछियंकं धइथें किभया थीथी लागाय् आक्रमण याःगु खः ।

युक्रेनया राष्ट्रपति भोलोदिमिर जेलेन्स्कीं रुसया याःगु थ्व आक्रमणयात ‘किभय् दकलय् तःधंगु ब्यालेस्टिक आक्रमणत मध्ये छगू’ जूगु धाःगु दु । रुसं कयेकूगु ४१ गः क्षेप्यास्त्रमध्ये १८ गः कुर्कागु व १०८ गः ड्रोनयात नं पंगः थनागु युक्रेनी सेनां दावी याःगु दु । युक्रेनी वायुसेनायाकथं किभयात कयाः जूगु लिपांगु आक्रमणय् इस्कान्देर व हाइपरसोनिक जिर्कोन क्षेप्यास्त्रसहित थीथी रुसी ल्वाभः प्रणाली व १२५ गः ड्रोन छ्यःगु खः।

राजधानी किभया मेयर भितालि क्लिच्कों आइतवाः आवासीय व गैर आवासीय भवन संरचनाय् तःधंगु क्षति जूगु व थुकीमध्ये व्यापारिक केन्द्र (सुपर मार्केट) व छात्रावास नं लाःगु जानकारी संचारमाध्यमयात बिउगु दु ।