स्वयम्भूइ दुर्लभ चतुरासिति पुजा

येँ(नेपालभाषा टाइम्स)- स्वयम्भू महाचैत्यय् विश्व शान्तिया कामना यासे दुर्लभ पुजा याःगु दु । थनया कंगय् च्वंगु नमुना बुद्ध विहारया ग्वसालय् वंगु कछलाथ्व पुन्हि (सकिमिला पुन्हि)कुन्हु स्वयम्भू महाचैत्यय् दुर्लभ चतुरासिति सहस्स पुप्फ पुजा याःगु खः ।

विश्व शान्तिया कामना यासें स्वयम्भू महाचैत्य जःखः च्वंगु दक्वं देगः, चैत्य, चीभाः लगायतया धार्मिकस्थलय् चय्प्यद्वः तफ्वःस्वां छाःगु खः । थुकथं हे तफ्वःस्वांया धर्मचक्र मण्डल दयेकाः विश्वया शान्ति कामना धकाः च्वयाः ब्वज्या नं याःगु खः ।

अखिल नेपाल भिक्षु महासंघया अध्यक्ष श्रद्धेय भिक्षु धम्मशोभन महास्थविरं पंचशील बियाबिज्याःगु ऐतिहासिक दुर्लभ पुजाय् भिक्षु शोभित महास्थविर व भिक्षु पञ्ञारतन महास्थविरं ८४द्वः व्यञ्जन बुद्ध पुजा याना बिज्याःगु खः ।

उगु इलय् महासंघया निवर्तमान महासचिव नापं बुद्ध विहारया प्रमुख भिक्षु कोण्डन्य महास्थविरं धर्मदेशना बियाबिज्याःगु खःसा भिक्षु सादर स्थविरं तफ्वःस्वांया पुजा यानाबिज्याःगु खः ।

ज्याझ्वलय् आनन्दकुटी विहारया भिक्षु धम्ममूर्ति महास्थविरं कोरोना, डेंगु थेंज्याःगु विश्वय् ब्वलना वयाच्वंगु थीथीकथंया महामारीपाखें बचे जुइत आर्शिवचन बियाबिज्याःगु खःसा भिक्षु गणपाखें मंकाः परित्राण पाठ नं यानाबिज्याःगु खः ।

उगु ज्याझ्वलय् आपालं भिक्षु, अनागारिका, उपासक उपासिकापिनिगु उपस्थिति दुगु खः ।

सम्बन्धित बुखँ

LEAVE YOUR COMMENTS