ने. सं. ११४३ चौलाथ्व सप्तमी -

मनकामनाय् भारतीय भक्तजन

गोर्खा जिल्लाया प्रसिद्ध मनकामना द्यःयाथाय् थ्व इलय् दर्शन यायेत वइपिं बछि स्वयां अप्वः भारतीय भक्तजनत जुयाच्वंगु दु । भारतय् तच्वंक तांन्वःगु छले यायेत नेपालय् चाःहिउ वइपिं पर्यतकत अप्वयेवं मनकामना द्यःयाथाय् नं भारतीय पर्यटकं जाःगु खः ।

मनकामना क्षेत्र विकास समितिया कार्यकारी निर्देशक गिरिधारी सापकोटायाकथं जेठ महिना शुरु जुइधुंकाःनिसें मनकामना वइपिं बछि स्वयां अप्वः भारतीय भक्तजन वयाच्वंगु दु । द्यःयाथाय् दर्शन यायेत न्हिं हे खुद्वः, न्हय्द्वलं मल्याक भक्तजन वयेगु यानाच्वंगु सापकोटां कनादिल ।

वय्कलं धयादिल, ‘थौंकन्हय् न्हिछियंकं स्वयेबलय् नेपाःमि स्वयां नं अप्वः भारतीयत खने दयाच्वंगु दु । बहनि लिबाक ७ ताःइलय् तक झ्वःछुनाः दर्शन यायेगु यानाच्वंगु सापकोटाया धापू दु । थगुने भारतीय प्रधानमन्त्री नरेन्द्र मोदीं नेपाःया धार्मिक पर्यटकीय क्षेत्रया अवलोकन याःगुया लिसें भारतीय पर्यटकया ल्याः अप्वःगु वय्कःया विश्लेषण दु ।

देगःया मूल पुजारी इन्सानबहादुर थापामगरं नं थ्व इलय् भारतीय भक्तजन गाक्कं अप्वयाच्वंगु धयादी । द्यःया दर्शन यायेत वइपिं बछि स्वयां अप्वःसिनं पिनें हे पुजा यायेगु यानाच्वंगु धासें वय्कलं भारतीय भक्तजनत थःगु पाः पियाः जूसां नं पुजा यायेगु यानाच्वंगु जानकारी वय्कलं बियादिल ।

थगुने भारतीय प्रधानमन्त्री नरेन्द्र मोदीं नेपाःया धार्मिक पर्यटकीय क्षेत्रया अवलोकन याःगुया लिसें भारतीय पर्यटकया ल्याः अप्वःगु वय्कःया विश्लेषण दु ।

मनकामना द्यःया शक्ति व महत्व भारतीय क्षेत्रय् नं प्रचार जुया वनेवं नेपाः वइपिं भारतीय पर्यटकतय्सं मनकामना द्यःया दर्शन यायेगु त्वःमफिकेगु इच्छा प्वंकेगु यानाच्वंगु धाःगु दु । मनकामना द्यःया दर्शन यायेत यक्व धइथें केबुलकार गयाः हे वनेगु यानाच्वंगु दु । छुं छुं धाःसा सतकया लँपु (पाः गयाः नं) वनेगु यानाच्वंगु दु ।

चितवनया कुरिनटारं गोर्खाया सहीद लखन गाउँपालिकाय् च्वंगु मनकामना द्यःयाथाय तक केबुलकार संचालन जुयाच्वंगु दु । मनकामना दर्शन प्रा.लिं. उगु केबुलकार संचालन याःगु खः । केबुलकार कम्पनीया नायब महाप्रबन्धक डिल्लीनारायण कायस्थया कथं वंगु छुं दिं न्ह्यः बुधवाःकुन्हु छन्हु जक ३,८०० म्ह भक्तजनं केबुलकारया यात्रा याःगुलिइ निद्वलं मल्याक भारतीय दुगु खः ।

ताल्लाया इलय् नेपाः चाःहिलेत वइपिं भारतीय पर्यटक अप्वःगुयालिसें मनकामना द्यःया दर्शन यायेत वइपिं नं अप्वःगु वय्कलं धयादिल । थगुनेया आर्थिक दँय् छगू लाख चय्छद्वः भारतीय तीर्थयात्री केबुलकार गयाः मनकामना द्यःया दर्शन यायेत वंगु खः । थ्व स्वयां न्ह्यःया आर्थिक दँय् छगू लाख झिंप्यद्वः दुगु खः ।

कायस्थं थुगु दँय् भारतीय भक्तजनया ल्याः निगू लाख थ्यनीगु कनादिल । चालु आर्थिक दँया आतकया दुने छगू लाख ख्वीन्याद्वलं मल्याक भारतीय भक्तजन केबुलकार गयाः मनकामना थ्यने धुंकूगु दु । थुगु दँय् केबुलकार गःपिं कुल संख्या १० गू लाख थ्यंगु दु । केबुलकार गइबलय् भारतीय पर्यटकं वये वने यायेत च्यासः तका दां पुलेमाः ।

नेपाःमिया निंतिं धाःसा ६४० तका कायम यानातःगु दुसा सार्क राष्ट्रया मेमेगु देय्या नागरिकया निंतिं १० डलर व मेमेगु देय्या निंतिं २० डलर कायेगु यानाच्वंगु दु । भारतीयतय् ल्याः आपालं दुसां मेमेगु देय्या धाःसा १ प्रतिशतया हाराहारीजक दुगु कायस्थं जानकारी बियादिल ।
आपालं भारतीय तीर्थयात्री ततःग्वःगु बसय् वइगु व उकी हे इमिसं नसाज्वलं ज्वरे याइपिं थलबल सहित वयेगु यानाच्वंगु दु ।

केबुलकारया चितवनपाखेया स्टेशनय् दुगु क्षेत्रय् नसाज्वलं ज्वरे यायेत व नयेत च्वनेगु निंतिं थाय्यातकं व्यवस्था मिले यानातःगु दु । न्युनतम शुल्कय् लः, मत व चःबियातकं व्यवस्था यानाः सुविधा सम्पन्न थाय्या व्यवस्था यानातःगु दु । चिकुला व वा वइगु इलय् धाःसा भारतीयत म्हो जक वयेगु यानाच्वंगु खनेदु ।

सवारी साधन ज्वनाः नेपाः चाःहिउ वइपिं भारतीय पर्यटकया निंतिं मुख्य पर्यटकीय गन्तव्यया लँपुइ लाःगु थाय् जूगुलिं नं भारतीय पर्यटक अप्वः वयेगु यानाच्वंगु कायस्थं कनादी ।