लैंगिक हिंसा विरुद्ध अन्तरक्रिया

येँ (नेपालभाषा टाइम्स) – येँ महानगरपालिकाया ग्वसालय् लैंगिक हिसा विरुद्ध छन्हुया अन्तक्र्रिया ज्याझ्वः जुल । लैंगिक हिंसा विरुद्धया १६ न्हुया अभियान शुरु जूगु न्हिकुन्हु हे लाकाः उगु अन्तरक्रिया ज्याझ्वः जूगु खः ।

‘लैंगिकताय् आधारित हिंसा’ विषयय् जूगु ज्याझ्वलय् नवासें येँ मनपा प्रमुख विद्यासुन्दर शाक्यं तुलानात्मक रुपय् येँय् मिसा हिंसाया घटना म्हो जक जूगु खँ न्ह्यथनादिसें धयादिल, ‘दुनें दुनें हिंसा जुयाच्वंगु दयेमाः झी सकलें जानाः थुकियात शुन्यया स्थितिइ हयेगु स्वयेमाः ।’

समृद्ध परिवारय् शारीरिक रुपं हिंसा मजूसां मानसिक हिंसा जूगु दयेमाः धासें सकतांकथंया हिंसाया अन्त्यया निंतिं सकलें मिले जुयाः ज्या योमाःगु वय्कलं धयादिल । प्रमुख प्रशासकीय अधिकृत राजेश्वर ज्ञवालीं येँया त्वाः त्वालय् हिंसाया अवस्था बारे सचेतनामूलक ज्याझ्वः संचालन यायेगु जुइ धयादिल ।

आमसंचारय् वःगु खँ सकसिनं ब्वने, न्यने व स्वये फइमखु उकिं माइकिंग यानाः ज्याया बारे जानकारी याकेमाःगु वय्कलं धयादिल । सामाजिक विकास विभागया प्रमुख दीपक अधिकारीं न्ह्यागु हे लिंगयापिं जूसां नं यौनजन्य नापं भेदभाव, अपमान, मानसिक, शारीरिक पीडा हिंसा खः धयादिल । मिसा अधिकारकर्मिलिसें अधिवक्ता मीरा ढुंगानां मिसातय्त कयाः जुइगु थीथी कथंया हिंसा व कानूनी प्रावधानी व नेपालय् मिसा अधिकार व कार्यान्वयनया अवस्था विषययात कयाः निगू ज्यापौ न्ह्याब्वयादीगु खः ।