कवि श्रेष्ठया स्याचुपि चिनाखँ मुना सफू पिदन

येँ(नेपालभाषा टाइम्स)÷ थिमिया साहित्यकारलिसें च्वमि व कवि ओम नरहरि साहु श्रेष्ठं च्वयादीगु ‘स्याचुपि’ नांया चिनाखँ मुना सफू पितब्वज्या जूगु दु ।

ल्याय्म्ह पुचः थिमिपाखें पिथंगु उगु सफू वाङ्मय शताब्दीपुरुष सत्यमोहन जोशीं पितब्वज्या यानादीगु खः । सफूया पितब्वज्या यासें मूपाहां जोशीं समाजया हिउपाःया निंतिं चिनाखँया माध्यमं नं महत्वपूर्ण भूमिका म्हिते फइ धासें साहित्यय् चिनाखँया महत्वया विषययात कयाः चर्चा यानादिल ।

च्वमि श्रेष्ठं मनूतय्के दइगु रिस, राग, द्वेष, लोभ, भय, तनाव, विपाकपाखें मुक्त जुइगु भावया नामं चिनाखँ मुना सफू तयार यानागु जानकारी बियादिल । लिसें वय्कलं सफुतिं देशय् थीथी कालखण्डय् जूगु घटनायात नं चिनाखँया माध्यमं आम जनमानसय् चेतना बीगु विश्वास प्वंकादिल ।

ज्याझ्वलय् बागमति प्रदेशया दुजः डा. राजेन्द्रमान श्रेष्ठं सफुति दुथ्यानाच्वंगु चिनाखँयात ल्वयेक सपूmया नां तयातःगु धासें समाजय् खने दयाच्वंगु हत्या, हिंसा, लुटपाट, भ्रष्टाचार थेंज्याःगु गतिविधि अन्तय जुइमाःगु व उकथंया हे भावना सफुतिइ दुग्यानाच्वंगु धयादिल ।
पुचःया नायः नरेश श्रेष्ठया सभापतित्वय् जूगु ज्याझ्वलय् मध्यपुर थिमि नगरपालिकाया प्रमुख मदनसुन्दर श्रेष्ठ, पुचःया पुलांम्ह नायः ओमप्रकाश श्रेष्ठ, ज्याझ्वः कजि रामकाजी श्रेष्ठपिंसं नं थःथःगु नुगःखँ तयादीगु खः ।
पितब्वज्या जूगु सफुतिइ कवि श्रेष्ठया नीखुपु चिनाखँ दुथ्यानाच्वंगु दु ।

सम्बन्धित बुखँ

LEAVE YOUR COMMENTS