किलाघः सांस्कृतिक पुचःया संस्थापक हनेज्या

येँ (नेपालभाषा टाइम्स) – थनया येँ मनपा १८ वडास्थित किलाघः सांस्कृतिक पुचः नीदँ पूवंगु लसताय् वंगु शनिवाः छगू ज्याझ्वःया दथुइ संस्थाया संस्थापक हना ज्याझ्वः याःगु दु। संस्था स्थापनाकालनिसें थीथी ख्यलय् योगदान बियादीपिं व्यक्तित्वपिन्त हनेज्या याःगु खः ।

नेपाल संवत् ११४१ न्हूदँ, झिन्हय्क्वःगु राष्ट्रिय ज्यापु दिवसया लसतालिसें पुचः २० दँ पूवंगु व खुक्वःगु दँमुँज्या हनेज्याझ्वलय् पुचःया गुरु गजेन्द्र महर्जन, कजि बुद्धिनारायण महर्जन, येँ मनपा २४ वडाया नायः बालकृष्ण श्रेष्ठ व समाजसेवी मदुम्ह ई. मोहनकृष्ण डंगोलयात हना लःल्हाःगु खः । ज्याझ्वःयात संवोधनयासें मूपाहां बागमति प्रदेशसभा दुजः राजेश शाक्यं सांस्कृतिक सम्पदाया संरक्षणय् ल्याय्म्ह पुस्ता न्ह्यज्याः वःगुलिं लसता प्वंकादिल । वय्कलं झीसं राजनीतिक विषयय् नं चिउताः तयेमाःगु खँ कुलादिसें थःपिं निरन्तर राजनीतिइ न्ह्यज्यानाच्वनागुलिं हे थौं थुगु थासय्थ्यं गु खः धयादिल ।

वय्कलं थौं येँया सांस्कृतिक सम्पदा संरक्षणय् नेवाः काय्मचा विद्यासुन्दर शाक्य मेयरय् त्याःगुलिं हे थुलि च्वन्ह्याक ज्या जुइफुगु खँ कुलादिल । नुगःखँ तयादिसें सम्मानित जुयादीम्ह येँ मनपा २४ वडाया नायः बालकृष्ण श्रेष्ठं थःगु थासं पुचःयात निरन्तर ग्वाहालि यानाच्वनेगु बचं बियादिल ।  वय्कलं किलाघःया दाजुकिजापिं सांस्कृतिक संरक्षणया निंतिं सल्लाह काः वःगु इलय् तत्कालीन येँ क्षेत्र नं. ७ या सांसद प्रा.डा. मंगलकृष्ण मानन्धरया सांसद विकास कोषपाखें ग्वाहालि चूलाका बियागु खँ न्ह्यथनादिल । वय्कलं न्हूगु ज्यासना पुचः नं थुकथं हे संस्कृति संरक्षणया निंतिं न्ह्यज्याइगु भलसा प्वंकादिल ।

ज्याझ्वलय् भिंतुना न्वचु तयादिसें नेपाल संवत् न्हूदँ राष्ट्रिय समारोह समिति ११४१ या नायः रमेश महर्जनं सांस्कृतिक ख्यःयात नं व्यावसायीक रुप बियाः न्ह्याः वनेमाःगु खँ कुलादिल । वय्कलं झीगु सांस्कृतिक बाजंयात परम्पराय् जक लिमकुंकुसे थुकिया आधुनिकीकरणपाखे नं बिचाः यायेत इनाप यानादिल । वय्कलं नेपाल संवत् नेपाःया राष्ट्रिय संवत् धाये धुंकाः नं थुकिया व्यवहारिक प्रयोगय् सरकार उदासिन जूगु खँय् चिउताः प्वंकादिल ।

ज्यापु महागुथि नेपाःया नायः लोककवि राजभाइ जकःमिं नेवाःत सांस्कृतिक ख्यलय् जक लिकुनां मगाः राजनीतिक ख्यलय् नं न्ह्यज्यायेमाः धयादिल । थौंया अवस्थाय् नेकपा पार्टीइ खनेदुगु विचलनं लोकतन्त्र हे खतरा वये फुगु अवस्थाय् नेवाःत सकलें छप्पँछधी जुयाः न्ह्यज्याः वनेमाःगु खँय् वय्कलं बः बियादिल ।

ज्यापु संस्कृति विकास कोषया नायः मंगलकृष्ण सिंहं ज्यापु दिवस शुरु जूगु इलंनिसें थौंया न्हितक किलाघः सांस्कृतिक पुचलं थीथी ज्याझ्वः यानाः यानावयाच्वंगु धासें दिवसयात कयाः ग्वाहालिया निंतिं सुभाय् देछानादिल । वय्कलं ज्यापु संस्कृति विकास कोषपाखें थुगुसी कोभिड-१९ या कारणं राष्ट्रिय सभागृहय् चीधंक व औपचारिक रुपं जक दिवस हनेत्यनागु जूसां लिपा लिपा तःजिक दिवस हनेगु इलय् पुचःपाखें ग्वाहालि दइगु भलसा नं प्वंकादिल । २०५७ सालय् धिमे व बासुरि प्रशिक्षणपाखें न्ह्याःगु पुचलं थौंया न्हितक थ्यंगु इलय् धिमे, बासुरि, पछिमा, परम्परागत म्येँ, खिं आदि बाजं स्यनेज्यालिसें युवातय्गु नेतृत्व व व्यक्तित्व विकासया निंतिं न्वचु कला तालिम, चिग्वः धिमे कासा, त्यःछिंत्यः, हिदान थेंज्याःगु सांस्कृतिक व सामाजिक ज्याझ्वःत न्ह्याका वयाच्वंगु पुचःया छ्याञ्जे रत्नकाजी महर्जनं लसकुसया झ्वलय् कनादिल ।

पुचःया नायः सानुकाजी महर्जनया सभापतित्वय् जूगु ज्याझ्वलय् न्हूगु ज्यासना पुचः नं ल्यःगु खः । न्हूगु ज्यासना पुचःया नायः सानुकाजी महर्जन, न्वकु सुनिल महर्जन छ्याञ्जे रत्नकाजी महर्जन, लिउछ्याञ्जे अनिमा महर्जन, दांभरिं तेजरत्न महर्जन, लिउदांभरिं रोहित महर्जन व दुजलय् अञ्जु महर्जन, श्याम महर्जन व अनिश महर्जनयात ल्यःगु दु ।

सम्बन्धित बुखँ

LEAVE YOUR COMMENTS