‘नेवाः पत्रकार दबुलिं राष्ट्रिय संचारयात हे विकास याइ’

चितवन – नेवाः पत्रकार राष्ट्रिय दबू केन्द्रीय समितिया बैठकया झ्वलय् चितवनय् स्थानीय नेवाः न्ह्यलुवापिंलिसे परिचयात्मक व अन्तक्रिया ज्याझ्वः जूगु दु । नेवाः पत्रकार राष्ट्रिय दबू चितवन शाखाया ग्वसालय् जूगु ज्याझ्वलय् न्ववासें दबूया केन्द्रीय सल्लाहकार पुष्करभक्त माथेमां नेवाः पत्रकार दबूयात मूलधारया पत्रकारतय्सं स्वयेगु दृष्टिकोण हे बिस्कं कथंया दुगु तर थज्याःगु दृष्टिकोणं भिं याइमखु धयादिसें बरु पत्रकार दबुलिं राष्ट्रिय संचारयात हे विकास याइ धयादिल ।

अथेहे नेवाः पुचः नारायणगढया नायः ज्ञानेन्द्र शाक्यं राष्ट्रं सयौं थुंगा पूmलका हामी, एउटा माला नेपाली धाःसां नेवाःत लिसें आदिवासी जनजातियात उगु माला दुने दुथ्याकेगु ज्या धाःसा मजू धयादिल । अथेहे वरिष्ठ कलाकार ऋद्धिचरण श्रेष्ठं नेवाःतय्सं स्वनिगलय् जक सीमित मजुसे स्वनिगलं पिहां वयाः नं ज्या यायेगु यात धाःसा पिने च्वंपिंत हःपाः दइगु बिचाः तयादिल ।
अथेहे नेवाः पुचः गैंडाकोट नगरसमितिया नायः राजकुमार श्रेष्ठं स्वनिगलं पिनेयापिंत नेवाः धकाः हे मतायेकू धयादिसें पिने नं नेवाःत दु धयागु थुइकेमाःगु खँ धयादिल । ज्याझ्वलय् सभापतिया थासं न्ववानादिसें दबूया केन्द्रीय नायः सुरजवीर वज्राचार्यं चितवन वयाः थःपिंसं ज्या यायेत छगू ऊर्जा ज्वना वनेत्यनागु खँ न्ह्यथनादिसें स्वनिगः पिनेयापिं नेवाः पत्रकारतय्त नेवाः भाय् स्यनेगु निंतिं दीर्घकालिन योजना ज्वनाः न्ह्याः वनेत्यनागु खँ धयादिल ।

चितवन शाखाया नायः कमलमान श्रेष्ठं सुभाय् देछायादीगु ज्याझ्वलय् वरिष्ठ चिकित्सक भक्तमान श्रेष्ठ, नेपाल आदिवासी जनजाति पत्रकार महासंघया महासचिवपिंलिसें थीथी व्यक्तिपिंसं न्ववानादीगु खः ।