किपुली १ निसें ३ तगिं तक नेपालभाषा

किपू (नेपालभाषा टाइम्स)÷कीर्तिपुर नगरपालिकां नं थ्वहे शैक्षिक सत्रंनिसें थः मातहत लाःगु फुक्कं सरकारी व निजी स्कुलय् नेपालभाषा विषय ब्वंकीगु जूगु दु । कीर्तिपुर नगरपालिकां स्कुलय् छसिकथं स्थानीय पाठ्यक्रमया रुपय् नेपालभाषा लागू याना यंकेगु नीति दयेकूगु दु । थ्व नीति कथं थुगु शैक्षिक सत्रय् कक्षा १ निसें ३ तक नेपालभाषा ब्वंकेगु निर्णय नगरपालिकां याःगु दु । थ्वयां लिपा दँय्दसं कक्षा थपे याना यंकेगु नीति नं नगरपालिकां दयेकूगु दु ।

राष्ट्रिय पाठ्यक्रम प्रारुप २०७५ य् यानातःगु व्यवस्था कथं स्थानीय विषयया रुपय् नेपालभाषा ब्वंकेत्यनागु खँ नगरपालिकां धाःगु दु । प्राथमिक तहया विद्यार्थीतय्त स्थानीय मूल्य मान्यता, कला, संस्कृति, सम्पदा, भाषा, व्यवसाय, पर्यटन थेंज्याःगु विषयय् ज्ञान बिया यंकेगु ताः तयाः थ्व विषय ब्वंकेत्यनागु खँ नं नगरपालिकां धाःगु दु ।

थुकिया लागिं नगरपालिकां शिक्षकतय्त स्थानीय पाठ्यक्रम अभिमुखीकरण तालिम नं बीगु जूगु दु । थ्वहे असार २० गतेनिसें उगु तालिम जुइ । उकी सहभागी जुइगु लागिं प्रत्येक स्कुलं छम्ह छम्ह नेवाः भाय् सःम्ह व थूम्ह शिक्षकयात छ्वया हजि धकाः नगरपालिकापाखें पौ नं छ्वःगु दु । थ्व तालिम कीर्तिपुर नगरपालिका दुने लाःगु सामुदायिक व संस्थागत फुक्क हे स्कुलया शिक्षकतय्त बीगु खँ धाःगु दु ।
स्थानीय तहलय् नेपालभाषा ब्वंकेगु लागिं थौंकन्हय् मेमेगु नं थीथी नगरपालिकाय् पहलत न्ह्यानाच्वंगु दु ।

सम्बन्धित बुखँ

LEAVE YOUR COMMENTS