बिस्काःया द्यःखः न्हिनय् सालीगु

ख्वप- थनया बिस्काः जात्रायात शान्तिपूर्ण रुपं सम्पन्न यायेत सरोकारवालात सहमत जूगु दु । जात्रा शान्तिपूर्ण व व्यवस्थित यायेत सरोकारवालातय् दथुइ जूगु मुँज्यां उगु सहमति याःगु खःसा थुगुसी लिबाक द्यः सालेगु मयासे न्हिनय् हे द्यः सालेगु खँय् नं सहमति जूगु दु ।

ख्वप नगरपालिकाया प्रमुख सुनिल प्रजापतिं जात्रायात शान्तिपूर्ण, व्यवस्थित व मर्यादित रुपं सम्पन्न यायेत छगू कार्यदल गठन यानागु जानकारी बिसें थुगुसी न्हिनय् हे द्यः सालेगुकथंया व्यवस्था यानागु धयादिल । मुँज्याय् जात्रा संचालन याइम्ह नाइके व पुजारीं गुथिं संस्थानं बीगु याना वयाचवंगु सेवा सुविधा म्हो जूगु खँय् असन्तुष्टि प्वंकुसे गुथिं बीगु पुजा नं लिबाक जक वइगु व थुकिं यानाः पुजा यायेगु ज्या नं लिबाः वनीगु कारणं द्यः साले बलय् द्यः खिउँसे च्वनीगु व थथे जुइबलय् अप्पां कयेकाः ल्वापु तकं जुइगु स्थिति वइगु खः धयादिल ।

थनया बिस्काः जात्राय् दँय्दसं हे भैलःखः सालेगु झ्वलय् अप्पां कयेकाः ल्वापु जुइगु व मानवीय क्षति तकं जुइगुलिं यानाः जात्रा संचालन जुइगु इलय् जात्राया बारे नकारात्मक सन्देश पिहां वनीगु जूगुलिं थुगुसी शान्तिपूर्ण व मर्यादित रुपं जात्रा सम्पन्न यायेत ख्वप नगरपालिकां सरोकारवालातय् छगू कार्यदल गठन याःगु खःसा द्यःखः नं न्हिनय् हे सालेगु खँय् सहमति प्वंकूगु खः ।

बिस्काः जात्रा स्वयां नं अप्पां कयेकाः ल्वापु जुइगु जात्राया रुपय् ब्याख्या यायेगु अप्वयेवं थुगुसी अज्याःगु समस्या मवयेकेया निंतिं न्हिनसिया २ ताः इलय् हे द्यःखः सालेगु व्यवस्था मिले यानागु ख्वप नगरपालिकां जानकारी बिउगु दु । लिसें जात्रा संचालन जुइगु दिं वइगु चैत २७ गते सुथसिया ७ ताः इलय् ख्वप नगरपालिका क्षेत्र परिक्रमा यायेगु व प्रचारप्रसार सहित सद्भाव ¥याली पिथनेगु नापं जनचेतना सभा तकं यायेगु योजना दयेकूगु दु ।

वइगु चैत २७ गते शुरु जुयाः बैशाख ५ गते क्वचाइगु जात्राया झ्वलय् ख्वप नगरन्यंकं भट्टी पसः, अय्लाः पसलय् निगरानी तयेगु नापं नियन्त्रणया निंतिं व्यापक प्रहरी परिचालन नं याइगु जूगु दु ।