नवलपरासी परियत्ति शिक्षा न्ह्यात
येँ – पश्चिम नवलपरासीया रामग्राम नगर पालिकाय् जिल्लाय् हे दकलय् न्हापांखुसि सामुदायिक विद्यालयसं बौद्ध दर्शनय् आधारित परियत्ति शिक्षा ब्वंकेगु शुरु याःगु दु । रामग्राम–१२ शान्तिचौर च्वंगु सरस्वती माविया विद्यार्थीया निंतिं परियत्ति शिक्षाया पाठ्यपुस्तक वितरण यानाः परियत्ति शिक्षा ब्वंकेगु ज्या न्ह्याकागु जिल्ला समन्वय समितिया प्रमुख शिवशंकरप्रसाद रायं जानकारी बियादीगु दु ।
बुद्धया पाजुपिनिगु छेँ तकं जुयाच्वंगु प्राचीन कोलीय राज्यया राजधानी रामग्रामया वासिन्दा हे बुद्धया जीवनी व शिक्षालिसे परिचित मजुयाच्वंगु अवस्थाय् आः सरस्वती माविं परियत्ति शिक्षा लागू यानाः उदाहरणीय ज्या याःगु खँ विद्यालयया प्रधानाध्यापक दयानन्द चौधरी कनादीगु दु । सरस्वती मावि परियत्ति शिक्षा नगरपालिकया जक न्हापांगु मजूसें जिल्लाया हे न्हापांगु विद्यालय जूगु खँ धाःगु दु ।
परियत्ति शिक्षां मस्तय्गु नैतिक शिक्षा बीत, पञ्चशीलया आचरण याकेत व न्हिथंया व्यवहारय् तकं हिउपाः हयेत ग्वाहालि याइगु जिल्ला समन्वय समितिया प्रमुख रायं कनादीगु दु । कक्षा १ निसें न्ह्याःगु शिक्षा दँय्दसं थपे यानायंकेगु योजना दु । थुकिं यानाः बौद्ध दर्शन अध्ययनया निंतिं ग्वाहालि जुइगु विद्यालयं धाःगु दु । अझ बुद्धया पाजुपिनिगु थाय् जक मखु हलिंन्यकंया च्यागू भागया छगू भाग गौतम बुद्धया अष्ट धातु दुगु रामग्राम स्तुप नं थन हे दु ।
नागरिक समाजया जिल्ला अध्यक्ष तकं जुयाच्वंम्ह विपश्यना साधक शम्भुप्रसाद उपाध्यायं परियत्ति शिक्षा मस्तय्त इलय् हे विपश्यनाया अभ्यास सयेकेत ग्वाहालि जुइगु जानकारी बियादिल ।
LEAVE YOUR COMMENTS