भारतीय सीमालिसे स्वाःगु देहाती गांया नेवाः

राजेन्द्र तुलाधरपाखें

येँ- प्रदेश नं. २ मूलतः मधेसी जनताया बाहुल्यता दुगु क्षेत्र खः । अथे खःसां अनया राजधानी वीरगंजय् धाःसा आपालं नेवाःतय् वस्ती दु । अझ वीरगंज नगर दयेकेगु ज्याय् तकं नेवाःतय् भूमिका दुसा वीरगंज नगर–पालिकाया न्हापांम्ह मेयर तकं नेवाः हे खः । तर वहे प्रदेश २ या अतिकं दुने थ्यंक भारतीय सीमा लिसे स्वाःगु छगू चीधंगु गामय् तकं नेवाःतय् बाहुल्यता दु व अन च्वंपिं नेवाःतय्सं थौं तक नं सःथे मसःथे नेवाः संस्कार व संस्कृति हनाच्वंगु दनि धायेबलय् धाःसा यक्वसित पत्याः याये थाकुइफु ।

वीरगंज थ्यने न्ह्यः हे वइगु जितपुरं बायाः करिब ३० किलोमिटर ति गांया लँपु जुयाः वनेबलय् थ्यनीगु छगू नांजाःगु थाय् खः ठोरी । भारतीय सीमालिसे स्वाःगु थ्व थासय् नं इलय् ब्यलय् भारतं सीमा अतिक्रमण यायेगु याः । थ्व हे ठोरी गाउँपालिकाया छगू गां खः सुवर्णपुर गन आपालं नेवाःतय् वस्ती दु । जवंखवं थारु, दथुइ नेवाः । अले थ्व लागाया मू बजाः नं थ्वहे छकू । थन च्वंपिं नेवाःतय्सं वि.सं. २०५५ सालय् ‘सुवर्ण नेवाः खलः’ चायेकूगु खः । थ्व खलःपाखें थौंकन्हय् न्हूदँया भिंतुना मोटरसाइकल ¥याली पिकायेगु लिसें यःमरि पुन्हि कुन्हु सार्वजनिक रुपं सांगीतिक ज्याझ्वः समेत याना वयाच्वंगु दु । स्थानीय नेवाःतय् इहि, बा¥हाः, कय्तापुजा व म्हपुजा समेत थ्वहे संस्थां याइ ।

नेवाःतय् भाय् व संस्कृति लोप जुइ धकाः ग्यानाः थ्व संस्था नीस्वनागु खःसां थनया नेवाःतय्सं नेवाः भाय् धाःसा मसःगु खँ उकिया नायः अमृत श्रेष्ठं कनादी । आः भाय् ल्हाये सयेकेत गाविसया फुक्क हे वडाय् खलःया उपसमिति चायेका वनेगु ग्वसाः दुगु खँ नं वय्कलं कनादिल । आः तक येँया छुं हे नेवाः खलःपुचःलिसे स्वापू तकं मतःनिगु सुवर्ण नेवाः खलकं आः येँलिसे स्वापू तयाः ज्याझ्वः यायेगु बिचाः नं यानाच्वंगु दु ।

सम्बन्धित बुखँ

LEAVE YOUR COMMENTS