‘एमालेया गतिविधि न्ह्याना हे च्वनी’

येँ – नेकपा एमालेया प्रवक्ता प्रदीप ज्ञवालीं पार्टी एकताया नामय् आः पार्टीया ज्या दिका तये मफइगु खँ धयादीगु दु । वरिष्ठ नेता माधव नेपाल पुचःया केन्द्रीय कमिटीया बैठकय् पार्टी एकता यायेगु खःसा फुक्कं ज्या दिकाः एकताया वातावरण दयेकेमाः धयागु खँ वयाच्वंगु इलय् ओली पक्षं उकियात हे लिसः बी कथं थज्याःगु धापू पित हःगु खः ।

विधान संशोधनय् दुथ्याकेमाःगु विषयय् सहलह यायेत अध्यक्ष ओलीं सःतूगु बैठकय् स्थायी कमिटीया दुजः, प्रदेशया नेतापिं, विधान संशोधन समिति व राजनीतिक प्रस्ताव तयार यायेत स्वनातःगु समितिया दुजःपिनिगु बैठक लिपा ज्ञवालीं उगु खँ धयादीगु खः ।

नेपाल पक्षं एकताया नितिं पार्टी गतिविधि दिकेमाः धकाः माग याःगु दु, छिकपिंसं छु यानादी धकाः पत्रकारतय्सं न्यंगु न्ह्यसःया लिसः बिसें ज्ञवालीं धयादिल, ‘पार्टीया नियमित ज्या न्ह्यानाच्वनी, सहलहया नामय् पार्टीया ज्या दिकेगु खँ जुइ मखु, गतिरोधय् वनेगु धइगु जुइ मखु ।’

वय्कलं स्थानीय तहया चुनाव न्ह्यःने वयाच्वंगु, पार्टी महाधिवेशन यायेमाःगु अवस्थाय् पार्टीया ज्या दिका तये फइ मखु धासें पार्टीया गतिविधि पनेमाःगु माग एमालेया हितय् मदुगु खँ नं धयादीगु दु ।