ने. सं. ११४६ चिल्लागा नवमी -

आः रुपा पक्षीय अभियन्तातय् निशाना मन्त्री श्रेष्ठपाखे

येँ -दलित मिसायात क्वथा मबिउ धइगु द्वपनय् हिरासतय् लाःम्ह स्थानीय सरस्वती प्रधानयात त्वःतकेगु लागिं प्रहरी चौकीइ मन्त्रीया गाडी हे ज्वनाः वंम्ह शिक्षा मन्त्री कृष्णगोपाल श्रेष्ठ विरुद्ध थौंकन्हय् विपक्षी पार्टी व नागरिक आन्दोलनकारीत लगे जूगु दु ।

तर वय्कःया विरुद्ध पिहां वःगु थ्व सःयात प्रधान पक्षधर अभियन्तातय्सं धाःसा मेगु धायेगु थाय् मदयाः मन्त्रीयात ब्वः बिउगु बाहेक मेता छुं मखु धयाहःगु दु ।

अभियन्तातय्सं धाः कथं मय्जु प्रधानयात मन्त्री श्रेष्ठं त्वःतकूगु मखु । सरकारी वकिलतय्सं हे प्रधानयात मुद्दा चले यायेछिं कथंया प्रमाण मगाः धासें वय्कःयात त्वःतेगु आदेश प्रहरीयात बिउगु खः । प्रहरीयाके नं प्रधानयात स्वन्हु तक जक कुनेगु अधिकार दु । मुद्दा चले याये मछिं धकाः सरकारी वकिलं धाःगुलिं प्रहरीं स्वन्हु लिपा त्वःतूगु खः ।

मन्त्री श्रेष्ठं ला त्वःतेधुंकूम्ह मय्जु प्रधानयात थःगु गाडीइ तयाः छेँय् तक त्वःतः वनेगु ज्या जक यानादीगु खः । मन्त्री श्रेष्ठं हे मय्जु प्रधानयात त्वःतकूगु खः धायेगु पाय्छि मजूगु खँ अभियन्तातय्सं धाःगु दु ।

प्रधानया पक्षय् भ्वं तयार यायेगु ज्या याना–दीम्ह कानून व्यवसायी नरेश कुमार श्रेष्ठं कनादी कथं निवेदक रुपा सुनारं प्रधानया विरुद्ध पेश यानादीगु प्रमाण मुद्दा चले यायेत प्रयाप्त मजू । छुं जुयाः उकी मुद्दा न्ह्यात हे धाःसां अदालतं उकियात खारेज याइगु सम्भावना दु ।

छाय्धाःसां सुनारं प्रधानलिसे जूगु खँल्हाबल्हाया गोप्य टेप बाहेक मेगु छुं प्रमाण पेश याःगु मदुनि । तर उगु टेपय् कानून आकर्षित जुइ कथं छुं अपमान जुइक छुं न्ववाःगु वा याःगु खने मदु ।

थ्व मुद्दा हे न्ह्याके मफइगु विषय जूगु कारणं उकिया बारे छुं धायेगु थाय् मदयाः आः सुनार पक्ष मन्त्री श्रेष्ठ विरुद्ध लगे जुयाच्वंगु खँ नं नेवाः अभियन्तातय्सं धाःगु दु । मय्जु प्रधानया छेँय् ९० दँ दुम्ह माजु लिसें प्वाथय् दुम्ह भौ नं दीगु खँ सीदुगु दु ।