काठमाडौं किन्डरगार्टेनय् यःमरि दयेकेगु धेंधेंबल्लाः कासा

येँ(नेपालभाषा टाइम्स)- थिंलाथ्व पुन्हि, यःमरि पुन्हिया लसताय् थनया काठमाडौं नेवाः किन्डरगार्टेनय् यःमरि दयेकेगु धेंधेंबल्लाः कासा–११४३ जुल । ब्वनेकुथिइ ब्वनाच्वंपिं मस्तय् अभिभावक दथुइ उगु कासा जूगु खः । मस्तय् अभिभावकपिंसं थःथःगु छेँय् दयेका हःगु यःमरि किन्डरगार्टेनया प्रांगणय् ब्वज्या यायेगु नापं यःमरिया बारे कनेगु ज्या नं याःगु खः ।

नेवाः समाजय् बुलुहुं संस्कार, संस्कृतिइ तना वनाच्वंगु स्थितियात ध्यानय् तयाः उकियात स्यनेकने यायेकथं ब्वनेकुथिं दँय्दसं उकथंया ज्याझ्वः याना वयाच्वंगु दु । अथे हे ब्वनेकुथि. नेवाः संस्कार, संस्कृति, परम्परा, नखःचखः, नसात्वँसाया बारे जानकारी बीगु ल्याखं थीथी नखःचखःया इलय् थुकथंया ज्याझ्वः याना वयाच्वंगु दु ।

ब्वनेकुथिया मस्तय्सं ‘त्यःछिं त्यः बकछिं त्यः….’ म्येँ हालाः लसकुस याःगु ज्याझ्वलय् नेपाःया नांजाःम्ह कार्टुनिष्ट रविन साय्मि मूपाहांकथं झायादीगु खःसा वय्कलं हे अभिभावकपिंसं दयेका हःगु मध्ये दकलय् बांलाःगु यःमरिया ल्यज्या यानादीगु खः ।

कासाय् ब्वनेकुथिया ब्वँमि मतिना महर्जनया मां मनिका महर्जनं दयेकादीगु यःमरिक उत्कृष्ट उत्कृष्ट घोषणा जूगु खःसा वय्कःयात मूपाहां साय्मिं सिरपाः लःल्हानादीगु खसा ब्वनेकुथिया निर्देशक राजेन्द्र महर्जनं दसिपौ लःल्हानादीगु खः ।