लुँया भावय् हानं कीर्तिमान ः छाय् थहां वनाच्वन भाः ?

येँ (नेपालभाषा टाइम्स)÷अमेरिकी फेडरल रिजर्भ बैंकया प्रमुख जेरोम एच पावेलं मुद्रास्फीति २ प्रतिशत स्वयां अप्वः कुहां वइगु खँ धायेवं अन्तर्राष्ट्रिय बजारय् लुँया भाः हानं थहां वनाः न्हूगु रेकर्ड कायम जूगु दु । वंगु छुं न्हि न्ह्यः बैंकया प्रमुख पावेलं मुद्रास्फीति २ प्रतिशतं कुहां वइगु खँ धाःगु खः । उकिया लिच्वः कथं अन्तर्राष्ट्रिय बजारय् लाःगु खँ नेपाल सुनचाँदी व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्यं ‘नेपालभाषा टाइम्स’ यात कनादीगु दु ।

पावेलं अमेरिकी आर्थिक अवस्था बांलाना वयाच्वंगुलिं मुद्रास्फीति २ प्रतिशत स्वयां अप्वः कुहां वइगु व फेडरल बैंकं अप्वयेके धाःगु ब्याजदर नं अप्वयेके मखु खँ धायेवं लगानीकर्तात लुँइ आकर्षिक जूगु खँ वय्कलं कनादिल ।

वय्कलं अमेरिकी बैंकया प्रमुखं ई स्वयां न्ह्यः हे न्ववाःगु कारणं लगानीकर्तातय्सं विश्वास याये मफयेवं अःखः लिच्वः लाःगु खँ कनादिल । वय्कलं धयादिल, ‘अमेरिकी फेडरल बैंकया प्रमुखं मुद्रास्फीति २ प्रतिशत स्वयां क्वय् कुहां वःगु इलय् थ्व खँ धाःगु खःसा लुँया भाः कुहां वइगु खः । तर वय्कलं ई स्वयां न्ह्यः हे धायेवं लगानीकर्तां विश्वास याये मफयेवं लुँइ लगानी आकर्षित जुयाः भाः थहां वंगु खः ।’

म्हिगः अन्तर्राष्ट्रिय बजारय् लुँया भाः छक्वलं औंशं २९ डलर थहां वंगु खः । म्हिगः लुँ प्रतिऔंश २०४४ डलर कायम जूगु खः । म्हीग तक २०१५ डलर थ्यनाच्वंगु खः । वय्कःया कथं न्हापा अन्तर्राष्ट्रिय बजारय् सन् २०२४ तक २१०० डलर थ्यनी धकाः प्रक्षेपण यानातःगु खःसा आः व घोषित ई स्वयां न्ह्यः हे २१०० डलर थ्यनीगु जुयाच्वंगु दु ।
म्हिगः नेपालय् लुँ तोलां १९ हजार ३०० तका थ्यंगु दु । लुँ तोलां १६ तका थहां वंगु खः ।

लुँया भाः थहां वनाः इहिपाया सिजनया इलय् नं व्यापार मदुगु खँ वय्कलं कनादिल । थौंकन्हय् विशाल बजारय् दुगु पसलय् तकं फ्रेस लुँया डिमान्ड मदुगु खँ धासें वय्कलं आः थःपिं फर्सदय् च्वनेमाःगु अवस्था वयाच्वंगु दु धयादिल । वय्कलं धयादिल, ‘न्हापा न्हापासा लुँया अभाव जुयाः हैरान जुइगु खःसा आः धाःसा ज्या मदयाः सुम्क च्वनेमाःगु अवस्था दु ।’

सम्बन्धित बुखँ

LEAVE YOUR COMMENTS