हुवावेया थःगु हे अपरेटिङ सिस्टम पिहांवल

चिनियाँ प्रविधि कम्पनी हुवावें थःगु हे मोबाइल अपरेटिङ्ग सिस्टम सार्वजनिक याःगु दु । अमेरिकां चिनियाँ कम्पनी हुवावेयात थीथी कथं प्रतिबन्ध तयेगु सुरु यायेवं हुवावे थःगु हे अपरेटिङ्ग सिस्टम पित हयेगु खँ धाःगु खः । थ्व हे झ्वलय् वंगु शुक्रवाः हुवावें थःगु हे अपरेटिङ्ग सिस्टम हार्मोनी ओएस सार्वजनिक याःगु खः ।

हुवावें थःगु मोबाइलय् अमेरिकी कम्पनीया एन्ड्रोइड अपरेटिङ्ग सिस्टम चले याना वयाच्वंगु खः । अमेरिकाया प्रतिबन्ध लिपा हुवावेया मोबाइलय् एन्ड्रोइड चले याके मबीगु निंतिं गुगुलं हुवोवयात स्वलाया अल्टिमेटम बिउगु खः । थ्व लिपा हुवावें थःगु अपरेटिङ्ग सिस्टमया विकासयात तिव्र गतिं न्ह्याकूगु खः ।

न्हूगु अपरेटिङ्ग सिस्टम वयेवं आः हुवावे एन्ड्रोइडय् निर्भर जुइमखुत । हार्मोन ओएस एन्ड्रोइड स्वयां थप अप्वः गतिं चले जुइगु ओएस खः । हुवावें थःगु अपरेटिङ्ग सिस्टम सार्वजनिक याःबलय् एन्ड्रोइडं बियातःगु स्वलाया अल्टिमेटम नं फुइधुंकूगु खः । अथे खःसां एन्ड्रोइडं हुवावेया फोनय् अझ नं थःगु अपरेटिङ्ग सिस्टम चले याके बियाच्वंगु दु ।