न्हूम्ह अर्थमन्त्री वयेवं बजाः थहांवन

येँ – अर्थमन्त्रीइ पुलांम्ह गभर्नर डा. युवराज खतिवडा नियुक्त जुइवं छुं न्हि न्ह्यवनिसें मदिक्क कुहां वनाच्वंगु शेयर बजाः मंगलवाः छुं भचा थहां वंगु दु । सरकारं सोमवाः मन्त्रिपरिषद् विस्तार यासें अर्थमन्त्रीइ अर्थविद् डा. युवराज खतिवडायात हयेवं बजाः थहां वंगु खँ धाःगु दु । मंगलवाः बजाः थहां वंगुयात लगानीकर्तातय्सं अर्थमन्त्री खतिवडायात लसकुस याःगु टिप्पणी जूगु दु । मंगलवाः नेप्से परिसुचक ५.८६ अंकं थहां वनाः १३६४ अंकय् थ्यंगु खः । मंगलवाः मुक्कं ५५ करोड ६८ लाख, ६० हजार तका बराबरया १५३ गू कम्पनीया ११ लाख ५१ हजार ९६५ कित्ता शेयर न्यायेमी जूगु खः । नेप्से थहां वनेगु निंतिं बैंकिङ, होटल, फाइनान्स, माइक्रोफाइनान्स व अन्य समूहं ग्वाहालि याःगु खः । बैंकिङ समूह ५.८६ अंकं, होटल समूह ३१.२६ अंकं, फाइनान्स समूह ३.०३ अंकं, अन्य समूह ११.९ अंकं व माइक्रोफाइनान्स समूह ०.९८ अंकं थहांवंगु खः ।