फोन यानाः ध्यबा तः वयेत इनाप

येँ – बैंकतय्सं थःथाय् ध्यबाया अभाव जुइवं निक्षेपकर्तातय्त फोन यानाः ध्यबा डिपोजिट याः वा धकाः इनाप यानाच्वंगु दु । बैंकतय्सं शर्ट टर्म फिक्स डिपोजितय् तकं अप्वः ब्याज बी धासें ध्यबा जम्मा यायेत निक्षेपकर्तातय्त इनाप यानाच्वंगु दु । बैकिङ प्रणालीइ तरलता अप्वयेवं बैंकतय्सं थौंकन्हय् त्यासा बीगु बन्द यानातःगु दु ।

न्हापा स्वीकृत जुइधुंकूगु त्यासा बीत तकं बैंकतय्त समास्या जुइवं अप्वः ब्याज बियाः जूसां नं निक्षेप दुकायेगु यानाच्वंगु खः । थ्व झ्वलय् गुलिखे बैंकतय्सं झिंन्यान्हु वा लछिया निंतिं फिक्स डिपोजिट यात धाःसा ९ निसें १० प्रतिशत तक ब्याज बीगु शुरु यानाहःगु दु । म्हो ईया निंतिं जूसां बैंकतय्सं ब्याज अप्वः बीगु थ्व ज्या न्हापांखुसी जूगु खँ बैंकरतय्सं धाःगु दु ।

म्हो ईया निंतिं न्हापा थुकथं अप्वः ब्याज बीगु चलन मदु ।थौंकन्हय् बैंकतय्सं ४ खर्ब त्यासाया कमिटमेन्ट यानातःगु दुसा उलि ध्यबा त्यासा बीत ५ खर्ब ५० अर्ब तक निक्षेप दुकायेमाःगु आवश्यकता दु । बैंकतय्सं तरलता अभाव जुयाः थःपिंके ध्यबा मदुगु खँ धायेगु याःसां राष्ट्र बैंक सूत्रं धाःसा वाणिज्य बैंकतय्सं थःपिंके दुगु ध्यबा विदेश छ्वयाः डलरय् लगानी याःगुलिं ध्यबाया अभाव जूगु खँ धाःगु दु । तरलता अभाव जुइवं राष्ट्र बैंकं नं टे«जेडी बिल पित बीत्यंगु दु ।