नेवाः देय् दबू येँ–द्वाल्खा सम्पर्क तदर्थ समिति

येँ(नेपालभाषा टाइम्स)-नेवाः देय् दबू येँ–द्वाल्खा सम्पर्क तदर्थ समिति गठन याःगु दु । थीथी कारणं द्वाल्खां येँ वयाः थीथी थासय् च्वना च्वंपिं द्वाल्खाया नेवाःतय् छगू भेलां उगु सम्पर्क तदर्थ समिति गठन याःगु खः ।

नेवाः देय् दबूया केन्द्रीय नायः पवित्र वज्राचार्यया प्रमुख आतिथ्यताय् जूगु भेलां समाजसेवी सकुना श्रेष्ठ मलेकुया अध्यक्षताय् नेवाः देय् दबू द्वाल्खा–येँ सम्पर्क तदर्थ समिति गठन याःगु खः । तदर्थ समितिइ शान्ति श्रेष्ठ व शंकर जोशी न्वकु, कल्पना श्रेष्ठ महर्जन मूछ्याञ्जे, सुनी प्रधान दांभरिंलय् च्वनादीगु दुसा दुजलय् सन्तोषी मानन्धर, मिलन श्रेष्ठ, रेजिना श्रेष्ठ व कल्पना जोशी च्वनादीगु दु ।

सल्लाहकारय् द्वाल्खाया साहित्यकार लिसें संस्कृतिह्यमि अमरकुमार श्रेष्ठ, हेम श्रेष्ठ, अञ्जु श्रेष्ठ च्वनादीगु दु ।

भेलाय् देय् दबूया नायः वज्राचार्यं स्वनिगलय् वयाः च्वना च्वंपिं द्वाल्खाया दाजु किजा तताकेहेंपिं थथे छगू हे थासय् मुनाः थःगु भाषा, कला, संस्कृति, जात्रा, परम्पराया निंतिं ल्यंका तयेगु ज्याय् न्ह्यज्याः वने फयेमा धकाः भिंतुना बियादिल ।

देय् दबूया न्वकुलिसें बागमति प्रदेश इन्चार्ज उमेश स्थापितं नेवाःतय्सं थःपिनिगु म्हसीका खाली थःपिं नेवाः धकाः जक बीत स्वयेगु मखसे नेवाःया धाथेंया विशेषता छु खः धकाः पिब्वयेगु व थ्व देय्यात म्हसीकेत नेवाःतय् भूमिका व योगदान छु धकाः नं सीके बी माः धयादिल ।

ज्याझ्वलय् देय् दबू स्वनिगः विशेष प्रदेशया नायः श्रीकृष्ण महर्जन, केन्द्रीय दुजः उपेन्द्र प्रधान, तदर्थ समितिया संयोजक मलेकु, द्वाल्खाया सभासद हेम श्रेष्ठ लगायतं नुगःखँ तयादीगु खः ।

सम्बन्धित बुखँ

LEAVE YOUR COMMENTS