चःमति मिसा खलःया साधारणसभा

येँ(नेपालभाषा टाइम्स)- चःमति मिसा खलःया झिंन्याक्वःगु साधारण सभा वंगु शनिवाः शोभा भगवती द्यःयाथाय् सवालाख मत च्याकाः पुजा यासें क्वचाल । खलःया नायः मन्दिरा महर्जनया सभापतित्वय् जूगु साधारण सभाय् बागमति प्रदेशया पुलांम्ह मुख्यमन्त्री अष्टलक्ष्मी शाक्य मूपाहांकथं झायादीगु खः ।

चःमति नेवाः खलःया नायः राजेन्द्र महर्जनं लसकुस यानादीगु ज्याझ्वलय् मिसा खलःया दांभरिं मिनाकुमारी श्रेष्ठं आर्थिक प्रतिवेदन न्ह्यब्वयादीगु खःसा नायः महर्जनं चालु आर्थिक दँया वार्षिक ज्याझ्वः न्ह्यब्वयादीगु खः ।

ज्याझ्वलय् मिसा खलकं संचालन याना वयाच्वंगु बचत ज्याझ्वलय् उत्कृष्ट मासिक बचतकर्ता धनमय्जु महर्जन व शोभा महर्जन, त्यासा चुक्ता यानादीम्ह ज्ञानी महर्जनयात मूपाहां पूर्व मुख्यमन्त्री शाक्यं बुद्ध मूर्ति लःल्हानादीगु खः ।

१५ वडाअध्यक्ष ईश्वरमान डंगोल, खलःया सल्लाहकारपिं शंकरलाल मानन्धर, कान्छाभाई डंगोल, तुतुभाई महर्जन, श्यामकृष्ण श्रेष्ठ, इन्द्र महर्जन, विष्णु श्रेष्ठ, ज्ञानी महर्जन, सानुछोरी ज्यापु, मिरा कर्माचार्य पाहांकथं उपस्थिति जुयादीगु ज्याझ्वलय् खलःया संरक्षक पूर्णकाजी ज्यापुं भिंतुनालिसें सुभाय् देछानादीगु खः ।