भर्चुअल हाइकु ज्याझ्वलय् हिउपाः

येँ- नेवाः हाइकु ख्यःया ग्वसालय् सामाजिक संजाल फेसबुकपाखें न्ह्यानाच्वंगु ज्याझ्वलय् हिउपाः हःगु दु । ग्वसाः खलकं बिउगु जानकारीकथं प्यपाः किपाया लिधंसाय् छनोट जूगु निकू निकू हाइकुयात ल्ययाः समीक्षा याकेगु नापं उकियात वाचन याकेगु ज्या जूगु खः ।

फेसबुकय् पित बिउगु किपाया लिधंसाय् च्वयातःगु हाइकुया ल्यज्याकथं किपा ल्याः ५३, ५४, ५५ व ५६या निम्ह निम्ह हाइकु च्वमिपिंत हाइकु वाचन याकेगु ज्या जूगु खः ।
हाइकु ख्यःया दिलबहादुर चित्रकारं लसकुस यानादीगु ज्याझ्वलय् समालोचक प्रा. प्रेमशान्ति तुलाधर मूवक्ताकथं झायादीगु खः । वय्कलं ज्याझ्वलय् वाचन जूगु हाइकु नापं ३८ कू हाइकुया समीक्षा यानादीगु खःसा डा. आनन्द जोशी, ध्रुव मधिकःमि, डा. पुष्पराज राजकर्णिकारं नं नुगःखँ तयादीगु खः ।