पञ्चवीर सिरपाः माधवलाल प्रधानयात

येँ – बुद्ध संवत् २६६४ या पञ्चवीर सिंह सिरपाः मदुम्ह च्वमि माधवलाल प्रधानयात बीगु क्वःजिउगु दु । ‘नेपालभाषा टाइम्स’ न्हिपती हरेक बुधवाः पिहां वइगु बुद्ध धर्मसम्बन्धी च्वसुत मध्ये दकलय् बांलाःगु च्वसुयात युवा बौद्ध समूहया पहलय् साहु पञ्चवीर सिंह तुलाधरं थ्व सिरपाः बीगु याना वयाच्वंगु खः ।

साहु तुलाधर समेतया उपस्थितिइ नकतिनि च्वंगु युवा बौद्ध समूहया मुँज्यां थ्व निर्णय याःगु खँ समूहया नायः मदनरत्न तुलाधरं कनादिल ।
आः वइगु असार १८ गते शनिवाः छगू ज्याझ्वःया दथुइ सिरपाः लःल्हायेगु ग्वसाः दुगु खँ नं वय्कलं कनादिल । थुगुसी थ्व सिरपाः मिजं च्वमि छम्हेसित जक बीत्यंगु खः ।