बन्द जुल गुगल प्लस

संसारया हे निगूगु दकलय् मूल्यवान ब्राण्ड जुयाच्वंगु गुगलं थःगु छगू असफल सामाजिक सञ्जालयात बन्द यानाबिउगु दु । गुगुलं थःगु असफल सामाजिक सञ्जाल गुगल प्लसयात मंगलवाः सुथंनिसें बन्द यानाबिउगु खः ।फेसबुक व ट्विटर थेंज्याःगु सामाजिक सञ्जालयात चुनौति बीत सन् २०११य् गुगल प्लस चायेकूगु खः । गुगलं थःगु मेगु लोकंह्वाःगु सामाजिक सञ्जाल युट्युब लिसे स्वानाः थुकियात प्रवद्र्धन यायेगु कुतः याःसा प्रयोगकर्तातय्सं उलि मययेकूगुलिं बन्द यायेमाःगु खः ।

गुगलया थ्व प्रोडक्टयात संचालनय् वःगु दछि मदुनिवं हे आलोचकतय्सं ‘मृत्यु जुइधुंकूगु’ घोषणा यायेधुंकूगु खः, तर सन् २०१८ य् गुगल प्लसय् दुगु तथ्यांक नं खुयाकाःगु सार्वजनिक जुइवं गुगलं थ्वयात बन्द यायेगु क्वःछिउगु खः । थ्व सुरु याःबलय् न्हापां सुयागुं निमन्त्रणाय् जक थुकी एकाउन्ट चायेकेफइकथं गुगल प्लस सुरु याःगु खः, तर छुं ई लिपा हे सकसियागुंनिंतिं चायेकूगु खः ।

थुकी नं मेमेगु सामाजिक सञ्जालय् थें कमेन्ट च्वयेगु, तस्बिर शेयर यायेगु सुविधा दुगु खः । अथेहे थुकिया मू सुविधा कथं पासापिनिगु सर्कलया आधारय् पुचः दयेके जिउगु व ह्यांगआउट धयागु समूहय् भिडियो कल यायेजिगु सुविधा बियातःगु खः । थ्व सुरु जुइवं लखौं प्रयोगकर्तातय्सं एकाउन्ट चायेकूसां उकी मध्ये तसकं हे म्होसिनं जक थ्व सामाजिक सञ्जाल छ्यलाबुला याःगुलिं समस्या जूवंगु खः ।