
येँ – येँ महानगरपालिकां मनपाया पुलांगु वस्तीया स्वरुप छगू हे यायेगु तयारी यानाच्वंगु दु । पुलांगु नेवाः वस्ती न्ह्यःनेया ब्व नेवाः पहः वयेक दयेकेगु कथं तयारी जुयाच्वंगु खँ मनपाया उपमेयर हरिप्रभा खड्गीं म्हिगः छगू ज्याझ्वलय् कनादिल ।
म्हिगः मछिन्द्र क्लबं ग्वसाः ग्वःगु सांस्कृतिक ब्वज्या व नेवाः नसा ब्वज्याय् वय्कलं उगु खँ धयादीगु खः । विदेशी पर्यटकत नेवाः कला संस्कृति स्वयेत नेपाः वइगु जुयाः नेवाः कला संस्कृति क्यनेगु निंतिं नं थुकिया निंतिं सहलह जुयाच्वंगु खँ वय्कलं कनादिल ।
येँ मनपाया मेयर विद्यासुन्दर शाक्यं उलेज्या यानादीगु उगु ज्याझ्वलय् कलाकारपिसं सांस्कृतिक ज्याझ्वः न्ह्यब्वःगु खःसा रञ्जना लिपिया क्यालिग्राफी यायेगु ज्या नं जूगु खः । लिपिया क्यालिग्राफी ज्याझ्वलय् आपालं गैरनेवाः व अन चाःहिउ वयाच्वंपिं विदेशी पर्यटकतय्सं नं रञ्जना लिपिं थःगु नां च्वकाः ब्वति काःगु खः ।
LEAVE YOUR COMMENTS