ने. सं. ११४४ कौलाथ्व पारू - नःलास्वनेगु

आः मेमेगु नगरपालिकाय् नं नेपालभाषा

येँ (नेपालभाषा टाइम्स) – येँ महानगरपालिकापाखें स्कूलया १ निसें ८ तगिं तक नेपालभाषाया माध्यमं स्थानीय विषय ब्वंकेगु धकाः निर्णय यायेवं देय्या मेमेगु नगरपालिकाय् नं उकिया लिच्वः लानावंगु दु। येँ मनपा अन्तर्गतया सरकारी व निजी स्कूलय् नेपालभाषाया माध्यमं स्थानीय विषय ब्वंकेगु निर्णय जुइवं भ्वत (बनेपा) या नेवाः खलः पुचःतय्सं बनेपा नगरपालिकाय् वनाः बनेपाया स्कूलय् नं नेपालभाषाया माध्यमं स्थानीय विषय ब्वंकेमाः धकाः माग याःगु दु ।

स्थानीय नेवाः गुथि समाज व मेमेगु खलः पुचःया प्रतिनिधितय्सं म्हिगः बनेपा नगरपालिकाया मेयर लक्ष्मीनरसिंह वादे श्रेष्ठयात नापलानाः भ्वतय् नं नेपालभाषा ब्वंकेत इनाप याःगु खः । भाषिक प्रतिनिधिपिंलिसे खँ ल्हासें मेयर श्रेष्ठं नेपालभाषा ब्वंकेत सकारात्मक बिचाः तयादीगु खः ।

वय्कलं थुकिया बारे थम्हं बुझे यायेगु व येँ मनपां तयार यानाच्वंगु स्थानीय विषयया पाठ्यक्रम बारे नं सहलह यायेगु जुइ धकाः कनादीगु खँ प्रतिनिधि मण्डलया दुजः दिलीप श्रेष्ठं ‘नेपालभाषा टाइम्स’ यात जानकारी बियादिल ।

अथे हे आः यल महानगरपालिकाय् नं नेपालभाषाया माध्यमं स्थानीय विषय ब्वंकेगु बारे खँल्हाबल्हा याः वनेत्यंगु खँ सीदुगु दु। यलया ज्यापु समाजपाखें थुकिया लागिं यल मनपालिसे खँल्हाबल्हा यायेत्यंगु खँ धाःगु दु। अथे हे मध्यपुर थिमि नगरपालिका व किपू नगरपालिकाय् नं नेपालभाषाया माध्यमं स्थानीय विषय ब्वंकेगु बारे आन्तरिक खँल्हाबल्हा जुयाच्वंगु खँ सीदुगु दु ।