नेपालय् कोरोना संक्रमित १० हजारं अप्वल, थप ५३८ म्हेसित संक्रमण

येँ – नेपालय् कोरोना संक्रमिततय् ल्याः १० हजारं अप्वःगु दु । स्वास्थ्य तथा जनसंख्या मन्त्रालयया कथं नेपालय् संक्रमिततय् ल्याः १० हजार ९९ म्ह थ्यंगु दु । वंगु नीप्यघौया दुने नेपालय् थप ५ सय ३८ म्हेसित कोरोना भाइरसया संक्रमण जूगु दु । उकी मध्ये ९० म्ह मिसात खःसा ४ सय ४८ म्ह मिजंत खः ।

अथेहे वंगु नीप्यघौया दुने ८ म्ह मिसा व ६८ म्ह मिजं सहित ७६ म्ह मनूत कोरोनामुक्त जुयाः अस्पतालं डिस्चार्ज जूगु दु । नेपालय् आः तक २ हजार २ सय २४ म्ह मनूत कोरोनामुक्त जूगु जानकारी स्वास्थ्य तथा जनसंख्या मन्त्रालयं बिउगु दु ।

कोरोना संक्रमणया कारणं नेपालय् थप छम्ह मनू सीगु दु । दैलेख दुल्लु–३ निवासी ४५ दँया मिजं असार ८ गते बहनी प्रादेशिक अस्पताल सुर्खेतय् वासः याकेगु झ्वलय् मदुगु खः । अस्पतालय् वासः याकेगु झ्वलय् असार ३ गते स्वाब संकलन याःगु खः । असार ४ गते वाःगु परीक्षणया लिच्वःलय् उम्ह मनूयात कोरोनाया संक्रमण जूगु पुष्टि जूगु खः । थ्व नापं नेपालय् कोरोना संक्रमणया काराणं सीपिं २४ म्ह थ्यंगु दु ।