वइगु बुधवाः खामेनीया अन्त्येष्ठि

तेहरान – इरानया सर्वोच्च नेता आयतोल्लाह अली खामेनीया सीम्ह अन्तिम श्रद्धाञ्जलीया निंतिं मस्जिदय् तःगु दु । अमेरिका व इजरायलया आक्रमणय् लानाः मदुम्ह इरानया सर्वोच्च नेता खामेनीलिसें वया छेँजःपिनि सीम्ह अन्तिम श्रद्धाञ्जलीया निंतिं मस्जदिय् तःगु खः ।

खामेनीया मृत्युया छुं ला लिपा वयागु अन्त्येष्टियात औपचारिकता बिउगु खः । वंगु फेब्रुअरी २८ य् अमेरिका व इजरायल यानाः इरानय् याःगु आक्रमणय् खामेनी सीगु खः । खामेनी व वया छेँजःपिनिगु सीम्ह अन्तिम श्रद्धाञ्जलीया निंतिं तेहरानया छगू मस्जिदय् तःगु खः ।

खामेनीयात श्रद्धाञ्जली देछायेगु निंतिं छुं विदेशी पाहांपिं नं तेहरान थ्यंकः वंगु दु । समाचार एजेन्सीतय्कथं पाकिस्तानया गृहमन्त्री मोहसिन नकबी, अफगानिस्तानया तालिबा सरकारया विदेशमन्त्री अमिन खान मुत्तकि, चिनिया कम्युनिष्ट पार्टीया उपप्रमुख नं तेहरान थ्यंकः वंगु दु । विदेशी पाहां सकलें प्रार्थना सभाय् हे उपस्थित जुयाः श्रद्धाञ्जली दे छाःगु खः ।

फेब्रुअरी २८ य् जूगु आक्रमणय् खामेनीलिसें वया छम्ह म्ह्याय्, जिलाजं, भौ (आःया सर्वोच्च नेता मोज्तबा खामेनीया जहान) लिसें मेपिं नं छेँजःपिं सीगु खः ।

खामेनीया अन्त्येष्ठिया वइगु बुधवाः याइगु जूगु दु । अन्त्येष्ठिया निंतिं आवश्यक तयारी न्ह्याये धुंकूगु दु । खामेनीया सीम्ह इराकया पवित्र सहर नजफ, कर्बला यंकाः उत्तर पूर्वय् च्वंगु मशहदस्थित इमाम रेजा (वयागु जन्मस् थल)या समाधिस् थलय् अन्त्येष्ठि याइ ।