दकलय् चिखागु छेँ

थौंकन्हय् मनूतय् अत्याधुनिक, सुविधा सम्पन्न, भव्य छेँ दनेगु धेंधेंबल्ला थें जुयाच्वंगु दु । थःगु पुलांगु छेँ थुनाः न्हूगु दयेकेमा वा जग्गा न्यानाः दनीगु छेँ जुइमाः तसकं सुविधा सम्पन्न, भव्य महल थें ज्याःगु छेँ दनेगु मनूतय् सौख जुयाच्वंगु दु ।छखे मनूतय् उकथं भव्य छेँ दनेगु तीव्र लहर वयाच्वंगु इलय् मेखे वैज्ञानिकतय्सं विश्वय् आतकया हे दकलय् चिखागु छेँ दयेकेत सफल जूगु दु ।

‘नानो’ प्रविधि छ्यलाः दयेकूगु उगु छेँया क्षेत्रफल मुक्कं ३०० वर्ग माइक्रोमिटर जक दु । लुमंकादिसँ १ माइक्रोमिटर धइगु १ मिलिमिटरया १ हजार भागया १ भाग खः ।‘जर्नल अफ भ्याकुम साइन्स एण्ड टेक्नोलोजी ए’ नांया पत्रिकाय् उगु छेँया बारे रिपोर्ट पिहां वःगु खः । उगु छेँ दनेत छ्यःगु रोबोटिक प्रणालीं सटिक रुपं नानो प्रविधियात ढाँचाय् स्वाये फइगु पत्रिकाय् धयातःगु दु ।

रिपोर्टय् धयातःकथं अनुसन्धानकर्ता आयन गिन्सं इलेक्ट्रोन बिम व नियन्त्रित रोबोटिक पाइलटिङय् हिलाः ‘अप्टिकल सेन्सिंग टेक्नोलोजी’पाखें उगु छेँ दयेकूगु खः । उगु छेँ दयेकेगु निंतिं हे फ्रान्सया फेम्टो एसटी इन्ष्टिच्युटया शोधकर्तातय्सं न्हूगु माइक्रोबोटिक्स प्रणालीया विकास याःगु खः ।