मोहनि न्ह्यः लुँया रेकर्ड

येँ (नेपालभाषा टाइम्स)- मोहनि न्ह्यःने वयाः लुँयागु भावं आः तकया हे दकलय् थिकेगु कीर्तिमान कायम याःगु दु । म्हिगः लुँया भावं न्हूगु रेकर्ड कायम यानाः प्रति तोला १ लाख १५ हजार ५०० तका थ्यंगु दु । थ्व आः तकया हे दकलय् अप्वःगु भाः खः ।

खास यानाः मध्यपूर्व एशियाय् थौंकन्हय् जुयाच्वंगु हमास–इजरायल युद्धया कारणं थ्व भाः थहां वनाच्वंगु खः । लुँया बजाः विश्लेषक तेजरत्न शाक्यं कनादीकथं थ्व भाः अझ हे थहां वनीगु सम्भावना दु । मध्यपूर्वय् अझ नं तनाव कायम दनिगु व युद्ध क्वमचाःनिगु कारणं लुँया भाः थहां वनीगु सम्भावना नं दयाच्वंगु खः ।

थ्व युद्धय् आः वयाः इरान नं सहभागी जूवःगु कारणं यानाः आः ओपेक संगठनं पेट्रोलया भाः नं थकायेगु धकाः तयारी यानाच्वंगु दु । यदि पेट्रोलया भाः थहां वन धाःसा उकिं यानाः लुँयागु भाः ला थहां हे वनी, उकिया नापनापं मेमेगु हलंज्वलंया भाः नं थहां वनेगु शुरु जुइ ।

लुँ उत्पादन यायेत पेट्रोलियम पदार्थया यक्व खपत यायेमाः । उकिं पेट्रोलया भाः थहां वन धाःसा उकिया लिच्वः लुँया उत्पादनय् नं लानाः लुँयागु भाः नं थहां वनेगु याइ । थ्व युद्धय् पेट्रोल उत्पादक मुस्मां देय्त प्रत्यक्ष रुपं संलग्न जुयाच्वंगु कारणं यानाः उमिसं अमेरिका लगायत युरोपियन मुलुकतय्त दुःख बीगु लागिं नं पेट्रोलया भाः थकायेगु ज्या यायेफु । अज्याःगु अवस्थाय् उकिया लिच्वः विश्व बजाःयात हे लाः वनी ।

आः थहां वनाच्वंगु भाःया ट्रेण्ड स्वयेबलय् लुँयागु भाः अझ नं थहां वनाः तोलां १ लाख २५ हजार तक थ्यने फइ धकाः नं अनुमान जुयाच्वंगु खँ शाक्यं कनादिल ।

मेखे अन्तर्राष्ट्रिय बजारय् लुँयागु भाः थथे थहां वनाच्वंगु कारणं यानाः नेपाःया लुँवहः बजाः नं प्रभावित जूगु दु । विश्लेषक शाक्यया कथं मोहनिया इलय् मनूतय्सं छुं भचा जूसां लुँ न्यानाः तया तयेगु चलन दु । तर थुगुसी मोहनिया इलय् हे भाः थहां वनाच्वंगु कारणं मनूतय्सं लुँ न्यायेगु नं बन्द याना हःगु दु । न्हापाया तुलनाय् आः लुँया कारोवार २५ प्रतिशत हे मदुगु खँ नं वय्कलं कनादिल ।

भाः थहां वंगुलिं छुं छुं थासय् बाहेक मेथाय् लुँयागु कारोवार मजुयाः नेपाःया लुँवहः व्यवसायीत मोहनिया इलय् कारोवार मदयेकाः च्वनेमाःगु खँ नं शाक्यं कनादिल ।