पुँजीगत लाभकर समस्या ज्यंकेत निर्देशन

येँ – अर्थ मन्त्रालयं नेपाल धितोपत्रय् बोर्डयात शेयरय् पूँजीगत लाभकरया विवाद स्वन्हु दुने ज्यंकेत निर्देशन बिउगु दु । थ्व विवादं यानाः शेयर बजारय् हे नकारात्मक लिच्वः लानाच्वंगु धासें मन्त्रालयं याकनं हे आवश्यक निर्णय यानाः समस्या ज्यंकेत निर्देशन बिउगु खः ।

छवाः न्ह्यव जक अर्थ मन्त्रालय जूगु सर्वपक्षीय भेलाय् लाभकरया गणना यायेत २०५८ साल निसें २०७६ असार मसान्त तकया औसत दर पिकयाः उकीया लाभकर गणना यायेगु खँ क्वःजिउगु खः । उबलय् नं मन्त्रालयं थ्व निर्णय कार्यान्वयन यायेगु निंतिं मौखिक निर्देशन बिउगु खः । आः मन्त्रालयं लिखित पौ हे छ्वयाः स्वन्हु दुने आवश्यक ज्या यायेत निर्देशन बिउगु खः ।

थ्व लिपा धितोपत्र बोर्डं नेपाल स्टक एक्सचेञ्जयात गणना विधि तयार यायेत निर्देशन बिउगु खःसा नेप्सें आः गणना विधिया खाका तयार यानाः संचालक समितिपाखें पारित याइगु जूगु दु । नेप्सेया संचालक समितिपाखें पारित यानाहःगु खाकायात धितापत्र बोर्डया संचालक समितिया बैठकय् यंकीगु व अन पारित यानाः जक पुँजीगत लाभकरया गणना विधि कार्यान्वयनय् वनीगु खँ धाःगु दु ।

पुँजीगत लाभकरया विवाद दछि न्ह्यवनिसें हे सुरु जूगु खः । पुँजीगत लाभकरयात कयाः लगानीकर्तातय्सं विरोध यानाच्वंगु खः । बजेट व आर्थिक ऐनय् पुँजीगत लाभकरया गणना भारित औसत लागतया आधारय् गणना यायेगु व्यवस्था यायेवं लगानीकर्तात आन्दोलनय् कुहां वःगु खः ।