आइफोन १५ य् टाइप सी चार्जर हे वइगु पक्का

एजेन्सी- वइगु सेप्टेम्बर १२ य् बजारय् वयेत्यंगु आइफोनया चार्जर ‘युएसबी टाइप सी’या जुइगु निश्चित जूगु दु । एप्पलं वइगु वालय् आइफोन १५ व आइफोन १५ प्रो बजारय् हयेत्यंगु दु । एपलं दयेकीगु फोन चार्ज यायेत बिस्कं हे लाइट्निङ एडप्टर छ्यलेमा, गुगु सामसुङ थेंज्याःगु मेमेगु स्मार्टफोनय् ज्या वइमखु । तर युरोपेली संघं सन् २०२४ दुने फुक्कं मोबाइलया चार्जर समान कथंया जुइमाःगु अनिवार्य यायेवं आइफोनय् नं युएसबी टाइप सीया चार्जरं ज्या याइगु निश्चित जूगु खः ।

उपभोक्तातय् ध्यबा बचत यायेत व चार्जर थेंज्याःगुलिं जुइगु फोहर म्हो यायेत युरोपेली संघं फुक्कं मोबाइल फोन उत्पादकतय्सं सन् २०२४ दुने अनिवार्य कथं छगू हे कथंया चार्जर दयेकेमाःगु कानुन दयेकूगु खः । एप्पलं न्हूगु आइप्याडयालिसें अप्वः थें न्हूगु उत्पादनय् युएसबी टाइप सी छ्यलेगु यायेधुंकल । अथे खःसां एप्पलं थ्व कानुनया विरोध याना वयाच्वंगु खः ।

एप्पलं छगू हे कथंया कनेक्टर अनिवार्य यायेगु कठोर कानुनं न्हूगु उत्पादनयात प्रवद्र्धन यायेगु स्वयां दमन याइ धासें थुकिं यरोप व विश्वन्यंकंया उपभोक्तातय्त क्षति हे याइगु खँ धया वयाच्वंगु खः।

लाइट्निङ पाखें युएसबी सी जोडे यायेजिउगु एडप्टर एमजनलिसें मेमेगु विद्युतीय सामग्री उत्पादन याइगु कम्पनीतय्सं थ्वयां न्ह्यः हे दयेकेधुंकूगु दु । आइफोन ८ लिपा उत्पादन जूगु आइफोनया मेमेगु फुक्कं संस्करणय् वायरलेस चार्जिङ सुविधा दु ।

आः चले जुयाच्वंगु आइफोन १४ लाइट्निङ चार्जिङ प्वाइन्ट दुगु एप्पलया दकलय् लिपांगु उत्पादन खः । यदि न्हूगु आइफोनय् युएसबी सी चार्ज पोइन्ट वल धाःसा थुकिं लाइट्निङ केबलया अन्त्य यानाबीगु जुइ ।

एप्पलया विश्वब्यापी उत्पादनय् हे थज्याःगु हिउपाः वयेत्यंगु खःकि युरोपय् जक वयेत्यंगु धयागु स्पष्ट जूगु मदुनि । तर एप्पलं युरोपेली बजाःया निंतिं धकाः जक बिस्कं हे उत्पादन याइगु सम्भावना धाःसा तसकं म्हो जक दु ।

 

सम्बन्धित बुखँ

LEAVE YOUR COMMENTS