ने. सं. ११४६ दिल्लाथ्व षष्ठी -

जोर्डनया घटनालिपा अमेरिका-इरान युद्ध तच्वःल

एजेन्सी – अमेरिका व इरान दथुइ पश्चिम एसियाय् न्ह्यानाच्वंगु युद्ध झन् तच्वःगु दु । लिपांगु इलय् जोेर्डनय् च्वंगु अमेरिकी सैन्य अड्डाय् इरानं याःगु आक्रमणय् निम्ह अमेरिकी सैनिक सीवं निगू देय्या युद्ध झन् तच्वःगु खः ।

इरानं याःगु आक्रमणय् निम्ह अमेरिकी सैनकि सीवं उकिया लिसः बीकथं अमेरिकां आइतवाः इरानया अर्धसैनिक बल इस्लामिक रिभोलुशनरी गार्ड कोप्र्सया सैन्य संरचनाय् हवाइ हमला याःगु खः । होर्मुज जलमार्गयात केन्द्रय् तयाः जुयाच्वंगु द्वन्द्वया दथुइ थुगु घटना लिपा अमेरिका व इरान दथुया तनाव झन् तच्वयावंगु खः ।

मध्यपूर्वय् अमेरिकी साझेदार देय्यात लक्षितयासे इरान जारी यानातःगु आक्रमणया झ्वलय् अमेरिकां प्रतिकार यायेकथं कारवाही याःगु खः । युद्ध अन्त्यया निंतिं जूगु अन्तरिम समझदारी असफल जुइवं निगुलि पक्षया सेनाया भिन्डत जूगु ल्वापुं तीव्रता कयाहःगु दु ।

अमेरिकां इरानय् च्वंगु ताँ, मतया पूर्वाधार व मेमेगु रणनीतिक महत्वया संरचनाय् आक्रमण यानाच्वंगु दु । थुखे इरानं कुवेतया मत व समुद्री लः प्रशोधन केन्द्रयात लक्षित यानाः जवाफी आक्रमण याना वयाच्वंगु दु । इरानं आक्रमणया दायरायात अझ विस्तार याना यंकेगु ख्याच्वः बीवं उखे संयुक्त अरब इमिरेट्सं सुरक्षा सतर्कता अप्वयेकूगु दु ।

अमेरिकी सेनाया केन्द्रीय कमान्ड सेन्टकमया कथं अमेरिकी आक्रमणय् इरानया तटीय निगरानी, हवाइ प्रतिरक्षा प्रणाली, समुद्री सैन्य क्षमता व क्षेप्यास्त्र भण्डार स्थलयात निशाना दयेकाच्वंगु दु । सेन्टकमया कथं थ्व अभियानय् न्हापांखुसी रिभोलुसनरी गार्डया संरचनायात प्रत्यक्ष रुपं लक्षित यानाः आक्रमण याःगु दु ।

थ्व हे झ्वलय् अमेरिकी सेनां सार्वजनिक याःगु छगू भिडियोय् लडाकु विमान व समुद्रं कयेकूगु ‘टोमहाक क्रुज क्षेप्यास्त्र’ छ्यःगु खनेदु । छगू लक्ष्य पहाडी क्षेत्रय् च्वंगु सैन्य आधार जूगु न्ह्यथंगु दु । रिभोलुसनरी गार्डं थःपिनिगु क्षेप्यास्त्र व मेमेगु सैन्य ज्वलं प्रायः पहाडी सुरुङ व आधारय् तयातःगु दु ।

अमेरिकी आक्रमणपाखें जूगु क्षतिया विस्तृत विवरण इरानं पित बिउगु मदुनि । होर्मुज जलमार्गयात केन्द्रय् तयाः न्ह्यानाच्वंगु लिपांगु आक्रमण छवाः पुलेधुंकूगु दु ।