रुसी ह्याकरतय्सं टोकियो ओलम्पिक्सय् आक्रमण याःगु दावी

एजेन्सी – रुसी ह्याकरतय्सं थ्व दँय् जुइमाःगु टोकिया ओलम्पिक्सय् पंगः थनेगु ताः तयाः आक्रमण याःगु खँ बेलायती अधिकारीतय्सं धाःगु दु। बेलायतया विदेश मामिला स्वइगु ज्याकुथिं रुसया जीआरयू सैन्य गुप्तचरतय्सं थःगु प्रभावं पिने लाःपिं अधिकारी व संगठनविरुद्ध साइबर आक्रमण याःगु खँ धाःगु दु ।

कोरोना महामारीया कारणं थ्व ओलम्पिक सन् २०२१ य् यायेगु धकाः सारे याये न्ह्यः थज्याःगु आक्रमण जूगु खँ धाःगु दु। तर बेलायती अधिकारीतय्सं थ्व आक्रमण गज्याःगु प्रकृतियागु व गुलि ग्यानापुगु धयागु धाःसा विस्तृत रुपं धाःगु मदुनि ।  थ्वहे दथुइ अमेरिकाया न्याया मन्त्रालयं खुम्ह रुसी गुप्तचरतय्विरुद्ध रुसयात रणनीतिक फाइदा दइकथं साइबर आक्रमण याःगु द्वपं बिउगु दु। अमेरिकी अभियोजनकर्तातय्सं थ्व पुचलं सन् २०१८ य् दक्षिण कोरियाय् जूगु हिउँदे ओलम्पिक, सन् २०१७ य् फ्रान्सया राष्ट्रपति निर्वाचन व युक्रेनया ऊर्जा ग्रीडय् लिच्वः लाकेगु कुतः याःगु खँ धाःगु दु ।

युक्रेनया ऊर्जा प्रणाली बन्द यानाबिउगु स्वदँ न्ह्यःया थ्व घटनां विश्वन्यंकं १० अर्ब डलरया क्षति जूगु अनुमान यानातःगु दु। सन् २०१८ या हिउँदे ओलम्पिकया उलेज्या समारोहयात लक्षित यानाः याःगु आक्रमण इंग्ल्यान्डया राष्ट्रिय सुरक्षा केन्द्या ग्वाहालिं विश्लेषण याःगु खः । थुकिय खनेदइकथंया लायेफुगु लिच्वःयात पनेत तालःसां थुकिं थीथी सञ्जालय् धाःसा लिच्वः लाकाः हिउँदे ओलम्पिक व पाराओलम्पिकया कासाय् पंगः थनेगु ताः तयाः आक्रमण जूगु खँ धाःगु दु ।

अमेरिकी सहायक न्यायाधिवक्ता जोन डमर्सं धयादीगु दु, ‘छुं नं देशं थःगु साइबर अस्त्रया क्षमतायात रुसं थें दुर्भाग्यपूर्ण वा गैरजिम्मेवारीपूर्णढंगं विकास याःगु मदु।’ वय्कलं थ्व आक्रमण छगू हे पुचलं याःगु आःतकया दकलय् अप्वः क्षति लाकीगु कथंया जूगु खँ धाःगु दु ।

सम्बन्धित बुखँ

LEAVE YOUR COMMENTS