चीनय् विमान दुर्घटना

एजेन्सी- चाइना इस्टर्न एयरलाइन्सया छगः विमान चीनया गुआंक्सी प्रान्तय् दुर्घटना जूगु दु । दुर्घटना जूगु विमानय् १२३ म्ह यात्रु व गुम्ह चालक दलया दुजः दुगु खँ धाःगु दु । सोमवाः सनिलय तकया दुने दुर्घटनाय् लानाःगु गुलि क्षति जुल धयागु स्पष्ट जानकारी मवःनि । सरकारी समाचार संस्थां धाःकथं बोइंग ७३७ विमान छगः पहाडी लागाय् कुतुं वंगु खः ।

स्थानीय ई कथं न्हिनय् सवा १ बजे कुनमिङ्गं गुआंजुया निंतिं ब्वःगु एमयु ५७३५ फ्लाइट दुर्घटना जूगु खः । चीनया नागरिक उड्डयन प्राधिकरणं नं दुर्घटनाया कारण बारे सीमदुनिगु खँ धाःगु दु । सरकारी टेलिभिजन सिसिटिभिं दुर्घटना जूगु थासय् राहतकर्मीत वनेधुंकूगु खँ धाःगु दु ।

दुर्घटना जूगु बोइंग ७३७–८०० विमान खुदँ पुलांगु जूगु खँ धाःगु दु । उड्डयन प्राधिकरणया कथं बुझो जिल्लाया सर्गतय् ब्वयाच्वंगु इलय् विमानलिसे स्वापू त्वाःदःगु खः ।

विमान दुर्घटना लिपा चाइना इस्टर्न एयरलाइन्सं थःपिनि वेबसाइटयात ब्लाय्क एण्ड ह्वाइट यानाबिउगु दु । एयरलाइन्स कम्पनीं दुर्घटनाय् सीपिंत श्रद्धाञ्जली देछाय् कथं थथे वेबसाइटयात ब्लाय्क एण्ड ह्वाइट
याइगु खः ।