म्यानमारय् ७ दँ दुम्ह मचायात गोली

एजेन्सी÷ म्यानमारया निगूगु तःधंगु शहर मान्डलेय् मंगलवाः छम्ह ७ दँ दुम्ह मिसामचायात गोलीं कयेकाः स्यानाबिउगु दु । उम्ह मचा सैनिक आक्रमणय् लानाः सीम्ह दकलय् म्हो उमेरम्ह खः । बिबिसीं धाःकथं खिन म्यो चित नांया उम्ह मचाया छेँय् सेनां खानतलासि याःवंगु व सेनां मचाया अबुयात बँय् ग्वातुकेगु धायेवं अबुयाथाय् वनेत स्वःम्ह मचायात गोलीं कयेकूगु खः। मस्तय्गु निंतिं ज्या याइगु संस्था सेभ द चिल्डे«नं घटनायात कयाः चिन्ता प्वंकूगु दु ।

म्यानमारय् सैनिक कूया विरोध यानाः ज्वनायंकूपि ६२८ म्ह प्रदर्शनकारीतय्त त्वःतूगु दु । म्यानमारय् च्वंगु जेलय् कुनातःपिं प्रदर्शनकारीतय्त बुधवाः इन्सेन जेलं त्वःतूगु खँ जेलया छम्ह वरिष्ठ अधिकारीं नां पित मबिउगु सर्तय् समाचार एन्जेसी एएफपीयात जानकारी बिउगु खः । जेलं ३६० म्ह मिजं व २६८ मिसातय्त त्वःतूगु खँ धाःगु दु ।

म्यानमारय् जुयाच्वंगु प्रदर्शनय् २७५ म्ह सीधुंकूगु दुसा सरकारं धाःसा १६४ म्ह जक सीगु धयाच्वंगु दु ।