वज्राचार्य क्लबं पंजरांपाखें मुंगु ध्यबा देय् दबूयात लःल्हाइगु
येँ(नेपालभाषा टाइम्स)÷वज्राचार्य क्लबपाखें दँय्दसं थें थुगुसी नं मंकाःकथं पंजरां फः वनीगु जूगु दु । वइगु गुंलागा जुगःचः¥हे (भदौ २६) मंगलवाःकुन्हु क्लबपाखें दँय्दसं थें मंकाःकथं पंजरां फः वनेत्यंगु खः ।
वकुन्हु येँ देय्या थीथी झिंच्यागू महाविहारय् वनाः पंजरां फः वनेगु व पंजरांपाखें मुंगु दानदक्षिणा (ध्यबा) नेवाः देय् दबूयया निर्माणाधीन दबू छेँया निंतिं ग्वाहालि यायेगु क्लबं जानकारी बिउगु दु ।
क्लबपाखें दँय्दसं थुकथं पंजरांपाखें संकलन जूगु दानदक्षिणा येँ देय्या हे थीथी महाविहार, क्वाःपाःछेँ आदि निर्माणया निंतिं ग्वाहालिकथं लःल्हायेगु याना वयाच्वंगु दु । थुगुसी धाःसा देय् दबूया दबू छेँयात ग्वाहालि यायेगु क्लबं जानकारी बिउगु दु ।
लिसें पंजरांकुन्हु सकल शाक्य वज्राचार्यपिं छगू थासय् मुनाः पंजरां फः वनेगु ज्याझ्वलय् ब्वति कायेत नं क्लबं इनाप याःगु दु ।
थ्व हे झ्वलय् वज्राचार्यं क्लबं फुटसल कासा नं याइगु जूगु दु । स्वनिगःया थीथी महाविहारया वज्राचार्य संघया प्रतिनिधित्व जुइकथं उगु फुटसल कासा यायेत्यनागु क्लबं जानकारी बिउगु दु ।
वइगु भदौ २६ गते शनिवाः बाँसबारीइ च्वंगु चौर रिक्रियसन सेन्टरय् जुइगु फुटसलय् १२ गू टिमं ब्वति काइगु जूगु दु । वज्राचार्य समुदायया ल्याय्म्हतय् दथुइ स्वापू क्वातुका यंकेगु व सामाजिक उत्तरदायित्व बहन यायेगु उद्देश्यं फुटसल कासा यायेत्यनागु क्लबं धाःगु दु ।
LEAVE YOUR COMMENTS