ने. सं. ११४६ चाैलागा चर्हे - मातातीर्थ चःह्रे

देय् दबू विरुद्ध मुद्दा खारेज

स्थगित जूगु च्याक्वःगु तःमुँज्या न्ह्याकेगु लुखा चाल
येँ (नेपालभाषा टाइम्स)/नेवाः देय् दबूया च्याक्वःगु तःमुँज्या सञ्चालन याये दइ मखु धकाः उच्च अदालतय् लाःगु मुद्दा अन्ततः खारेज जूगु दु । उच्च अदालत यलपाखें म्हीग उगु मुद्दा खारेज याना बिउगु खः । मुद्दा खारेजीया नापनापं स्थगित जुयाच्वंगु देय् दबूया च्याक्वःगु तःमुँज्या न्ह्याकेगु लँपु नं चाःगु दु ।
उच्च अदालत यलया १ नम्बर इजलासय् मुख्य न्यायाधीश लालबहादुर कुँवर व न्यायाधीश स्वीकृति पराजुलीया मंकाः इजलाशं नेवाः देय् दबू विरुद्ध लाःगु रिट हे खारेजीया फैसला याःगु खः ।
वंगु जेठ २ गते नवलपरासीइ देय् दबूया च्याक्वःगु तःमुँज्या सञ्चालन जुयाच्वंगु हे इलय् तःमुँज्या स्थगित या धकाः अदालतं आदेश बिउगु खः । अदालतया आदेश लिपा तःमुँज्या भद्रगोल जूवंगु खःसा अदालती आदेशप्रति सम्मान यासें तःमुँज्या स्थगित याःगु खः ।
थ्व मुद्दाय् मू रुपं वहस यानादीम्ह वरिष्ठ अधिवक्ता लिसें नेवाः देय् दबूया सल्लाहकार डा. मुक्ति प्रधानं ‘नेपालभाषा टाइम्स’यात कनादीकथं थ्व फैसलां रिट तःपिं पराजित जूगु दुसा देय् दबू विजयी जूगु दु । देय् दबू विरुद्ध तःगु रिट हे खारेज जूगु कारणं आः मुद्दाय् मेगु छुं कथंया आदेश मवइगु खँ वय्‌कलं कनादिल ।
रिट तःपिंसं नेवाः देय् दबुलिं थः संस्थापक दुजःतय्‌त तःमुँज्याय् प्रतिनिधि मदयेकू धइगु जिकिर यासें तःमुँज्या स्थगनया माग याःगु खः । तर देय् दबूया विद्यमान विधानय् संस्थापक दुजःतय्‌त तःमुँज्याय् प्रतिनिधित्व याकेमाःगु छुं प्रावधान मदुगु कारणं थ्व विवाद यायेमाःगु विषय मखु धासें रिट खारेज याना बिउगु खः ।
नेवाः देय् दबूया संस्थापक दुजःपिं प्रकाशमान पालिखे (पोखरा), नरेशवीर शाक्य (येँ), डा. केशवमान शाक्य (येँ), शंकरनारायण श्रेष्ठ (तनहुँ), डा. राजाराम श्रेष्ठ (आँबुखैरनी), भगवानबाबु मास्के (गोरखा) व अशोक पालिखे (पोखरा) पाखें देय् दबूया तःमुँज्या स्थगित याये माल धकाः शुरुइ येँया सिडिओ ज्याकुथिइ उजुरी तःगु खः । सिडियोपाखें तःमुँज्या याःसां जिउ धइगु निर्णय जूगु खःसा वयां लिपा उमिसं उच्च अदालत यलय् मुद्दा दर्ता याःगु खः ।

आः तःमुँज्या गबले ?

उच्च अदालतया फैसला लिपा देय् दबूया च्याक्वःगु तःमुँज्या यायेगु लुखा चाःसां गबले तःमुँज्या यायेगु धइगु खँ आः बैठक च्वनाः क्वःछीगु खँ देय् दबूया नायः पवित्र वज्राचार्यं कनादिल । ‘नेपालभाषा टाइम्स’ लिसे खँ ल्हासें वय्‌कलं धयादिल, ‘तःमुँज्या यायेत ६० न्हु न्ह्यः जानकारी बीमाः धइगु प्रावधान दु । मोहनि स्वन्ति थेंज्याःगु नखः न्ह्यःने तःमुँज्या याये फइगु खँ मदु । आः न्हूदँ लिपा हे जक तःमुँज्या सम्भव जुइगु खनेदु ।’ तःमुँज्या स्थगित जुयाः आपालं ध्यबा नोक्सान जूगुलिं आः मेगु तःमुँज्या राजधानी येँय् अतिकं मितव्ययी ढंगं याये मालीगु बिचाः नं देय् दबूया पदाधिकारीतय्‌सं तयाच्वंगु खनेदु ।