नेपालभाषा खलःया नायः मंत

हेटौंडा- नेपालभाषा खलः मकवानपुरया नायः मंगलकृष्ण मानन्धर वंगु शनिवाः आकाझाकां मंत । वय्कः ६४ दँ दुम्ह खः । शनिवाः सुथय् म्वःल्हुइत फ्यतुनाच्वंगु इलय् आकाझाकां वय्कः अचेत जूगु खः । लिपा अस्पताल यंकूबलय् वय्कः हृदयाघात जुयाः मदुगु खँ चिकित्सकतय्सं धाःगु खः ।

मदुम्ह मानन्धर आः वइगु शनिवाः नेपालभाषा खलःया ग्वसालय् जुइगु लोककवि गणेशलाल श्रेष्ठया १०५ दँ बुन्हि हनेगु ज्याझ्वलय् व्यस्त जुया च्वनादीम्ह खः । उगु ज्याझ्वलय् कविता पाठ यायेगु लागिं येँपाखें नं कविपिं वये माल धकाः वय्कलं इनाप याना च्वनादीगु खः ।
मदुम्ह मानन्धरया अन्त्येष्टि न्ह्यः वय्कःया मिखादानया ज्या नं जूगु खः । वय्कःया जहान लिसें निम्ह म्ह्याय्पिं दी । वय्कःयात जहानं मि तयादीगु खः ।