एकेडेमिया सर्जक व सृजनाय् कवि योगेन्द्र प्रधान
येँ (नेपालभाषा टाइम्स)÷ नेपालभाषाया आधुनिक कवि योगेन्द्र प्रधानया कविता, कृतित्व व व्यक्तित्वयात कयाः नेपालभाषा एकेडेमिपाखें सर्जक व सृजना ज्याझ्वः यात । ज्याझ्वलय् कवि प्रधानया काव्य प्रवृत्तियात कयाः चर्चा यायेगु लिसें वय्कःया कविता वाचन यायेगु ज्या जूगु खः ।
कवि त्रिरत्न शाक्यं लसकुस यासें न्ह्याकूगु उगु ज्याझ्वलय् प्रा. प्रेमशान्ति तुलाधरं कवि योगेन्द्र प्रधानया आः तक पिहां वयेधुंकूगु गुंगू कविता संग्रहं नेपालभाषा काव्य ख्यःयात याःगु योगदानया चर्चा यानादीगु खः ।
अथे हे विराट गुथिया नायः महेन्द्रगोपाल कर्माचार्यं कवि प्रधानं कविता च्वयेगु जक मखु, आवश्यक जूगु इलय् प्याखं हुलेगु व नाटकय् म्हितेगु ज्या समेत याःगु प्रशंगत न्ह्यथनादिल ।
नेवाः न्ह्यलुवा नरेन्द्रभक्त हाडां योगेन्द्र प्रधान व्यक्तिगत रुपं तसकं कोमल व शालीन खःसां काव्य अभिव्यक्तिइ धाःसा अतिकं क्रान्तिकारी बिचाः अभिव्यक्त यानादी धयादिल ।
नेपालभाषा एकेडेमिया सदस्यसचिव डा. पुष्पराज राजकर्णिकारं कवि प्रधान थम्हं कविताय् गज्याःगु बिचाः प्रवाह याइगु खः जीवनय् नं वहे बिचाः ज्वनाः म्वाइम्ह व्यक्ति खः धयादिल । ज्याझ्वलय् कवि योगेन्द्र प्रधानं थःगु पुलांगु छुं लुमंति कनादिसें थम्हं च्वयादीगु अप्रकाशित कवितात पाठ यानादीगु खः ।
नेपालभाषा एकेडेमिया चान्सलर यज्ञरत्न धाख्वाया सभापतित्वय् जूगु उगु ज्याझ्वलय् गायकपिं गुज्ये मालाकार, सत्यनारायण मानन्धर, रफिला महर्जनपिंसं म्ये न्यंकादीगु खःसा कविपिं नारद वज्राचार्य, सुरेश किरण, नविन प्रकाश श्रेष्ठ व रश्मि नापितं कवि प्रधानं च्वयादीगु कविता पाठ यानादीगु खः ।
LEAVE YOUR COMMENTS