भिक्षु, अनागारिका स्वास्थ्योपचारया निंतिं पञ्चवीर साहुपाखे छगू करोड झिंछगू लाखया कोष
येँ – नेपाःया थेरवाद बुद्ध शासनय् प्रव्रजित जुयाबिज्याःपिं श्रद्धेय भिक्षु, श्रामणेर व अनागारिका गुरुमांपिनिगु भिं–उसाँय्या तातुनाः प्रव्रजित स्वास्थ्य अक्षय कोष नीस्वंगु दु । श्रद्धालु दाता उपासक पञ्चवीर सिंह तुलाधरं थेरवाद बुद्ध शासनय् गृहस्थ त्वःताः प्रव्रजित जुयाबिज्याःपिं भिक्षु, श्रामणेर व अनागारिकापिनिगु भिं–उसाँय्या तातुनाः छगू करोड झिंछगू लख झिंछद्वःसछि व झिंछतका दांया स्वास्थ्य अक्षय कोष स्वनादीगु खः । थेरवाद बुद्ध शासनय् प्रव्रजित वसपोलपिनिगु भिं–उसाँय्या तातुनाः बुद्ध शासनप्रति थःगु नुगः तफाः यासें दाता तुलाधरं उगु कोष स्वनादीगु खः । दाता तुलाधरं कोषया मा मस्यंकुसे आवधिक व्याज रकम जक छ्यलाः परन्तुतक न्ह्याका यंकेगु ल्याखं उगु कोष अखिल नेपाल भिक्षु महासंघयात लःल्हानादीगु खः ।
ज्याझ्वलय् महासंघया उपाध्यक्ष भिक्षु धर्ममूर्ति महास्थविरं लसकुस यानाबिज्याःगु खःसा उगु इलय् संघनायक भिक्षु बोधिसेन महास्थविर, संघउपनायक भिक्षु गुणघोष महास्थविर, अखिल नेपाल भिक्षु महासंघया नायः भिक्षु मैत्री महास्थविर, महासंघया पदाधिकारी, भिक्षुगणलिसें अनागारिका पञ्ञावती, अनागारिका डा. धम्मविजया, अनागारिका दानवतीलिसेंया गुरुमांपिनिगु उपस्थितिइ दाता तुलाधरं संघनायक भिक्षु बोधिसेन महास्थविरयात श्रद्धा दान लःल्हानादीगु खः ।
श्रद्धादान लःल्हासे दाता तुलाधरं थेरवाद भिक्षु गुरुमांपिनिगु स्वास्थ्योपचारया निंतिं स्वयम भिक्षु महासंघ न्ह्यज्यानाः मूलधन सुरक्षित यानाः अक्षय कोषया ब्याजपाखें निरन्तर ग्वाहालि याना वनेगु व थथे जुल धाःसा कोषया रकम नं अप्वया वनीगु विश्वास प्वंकादिल ।
भिक्षु महासंघया महासचिव भिक्षु कोण्डन्य महास्थविरं दाताया सदिक्षाकथं थेरवाद बुद्ध शासनय् समर्पित जुयाबिज्याःपिं भिक्षु, श्रामणेर व अनागारिकापिनिगु निंतिं निर्देशिका दयेकाः भिक्षु महासंघपाखें पारदर्शी रुपं कोषया आवधिक ब्याज जक सदुपयोग यायेगु जानकारी बियाबिज्यात ।
नेपाल परम्परागत बुद्धधर्म संघया नायः प्रा. डा. नरेशमान वज्राचार्यं नं नुगःखँ प्वंकादिसें संघपाखें नं कोषय् छगू लख तका ग्वाहालि यायेगु घोषणा यानादीगु खः । अथे हे स्वयम्भूवीर सिंह व हितलक्ष्मी कसाःपाखें प्यंगू लख, युवा बौद्ध समूह, येँय्पाखें छगू लख, पूर्ण–मथुरा स्मृति कोषपाखें १,११,१११÷–, न्हुछेमाया तुलाधरं छगू लख न्याद्वः, सानुबाबु साय्मि व भगवानदेवी मानन्धरं छगू लख, बलराम व उमा चित्रकारं छगू लख, दिवंगत अमृतसागर व दिवंगत केशलक्ष्मी तुलाधरया लुमन्तिइ छगू लख, दिवंगत नीरशोभा चित्रकारया नामं न्यय्द्वः, मोहनदेवी चित्रकारं न्यय्द्वः, शान्तलक्ष्मी वज्राचार्य न्यय्द्वः तका ग्वाहालि नं घोषणा यानादीगु खः ।
ज्याझ्वलय् संघनायक भिक्षु बोधिसेन महास्थविरं भिक्षु महासंघपाखें विशेष साधुवाद पत्र दातायात लःल्हानाबिज्याःगु खःसा वसपोलं सकल श्रद्धादान दातासहितया आयु आरोग्यया कामना नं याना बिज्याःगु खः । उगु इलय् भिक्षु महासंघपाखें बुद्धवचन परित्राण पाठ यानाबिज्याःगु खःसा महासंघया नायः भिक्षु मैत्री महास्थविरं सकललित साधुवाद देछासे पुण्यानुमोदन यानाबिज्याःगु खः ।
LEAVE YOUR COMMENTS