येँयाःया लसताय् म्येँ कासा जुइगु

यल(नेपालभाषा टाइम्स)÷ यल महानगरपालिका १६ वडा कलाकार समितिया ग्वसालय् येँयाः नखःया लसताय् नेपालभाषाया म्येँ कासा याइगु जूगु दु । समितिं छगू पत्रकार सम्मेलन यासें वइगु असोज ११ गते ‘लिटिल स्टार नेपालभाषा म्येँ कासा’ जुइगु जानकारी बिउगु खः ।

भन्दाः क्यबय् जुइगु कासाय् न्हाप, लिउ, लियांलिउ, हःपाःलिसें उत्कृष्ट म्येँ च्वमि, लय् चिनामि व म्येँ हालामियात नं सिरपाः बीगु यल महानगरपालिका १६ वडाअध्यक्ष निर्मलरत्न शाक्यं जानकारी बियादिल । कासाय् न्हापयात छगू लख, लिउयात न्हय्न्याद्वः लियांलिउयात न्यय्द्वः व हःपाःयात नीन्याद्वः सिरपाः बीगु लिसें उत्कृष्ट म्येँ हालामि, च्वमि, लय्चिनामियात नीन्याद्वः तका दांलिसें ट्रफी, दसिपौ लःल्हायेगु जानकारी वय्कलं बियादिल ।

समितिया संयोजक सुरजवीर वज्राचार्यं छम्ह वरिष्ठ कलाकारयात ‘ललित रत्न’ सम्मान लःल्हायेगु जानकारी बियादिल । लुमंकेबहजू न्हापांखुसी वरिष्ठ कलाकार मोहनप्रसाद जोशीयात उगु सम्मान लःल्हाःगु खः ।

लिटिल स्टार रेकर्डया प्रायोजनय् पाटन म्युजिमया ग्वाहालिइ जुइगु कासाय् ब्वति कायेत फाराम दुथ्याकेमाःगु ग्वसाः खलकं जानकारी बिउगु दु ।